Ilisimatusarfimmi instittuttit ilaat pisortartaartoq
Savalimmiormiu Gestur Hovgaard, Ph.D.tut ilisimatusarsimasoq, Savalimmiormiullu ilisimatusarfianni lektoriusoq, inuiaqatigiilerinermik, Aningaasaqarnermik Tusagassiornermillu Ilisimatusarfimmi pisortatut atorfinitsinneqarpoq, marsillu ulluisa 15-ianni sulilissalluni.
Gestur Hovgaard, Atlantikup avannaani Issittumullu tunngasunik tamatigoortumik misilittagaqartoq Ilisimatusarfiup nalunaarutigaa:
- 1993-imi kandidatinngoramili Savalimmiuni Danmarkimilu ilisimatuutut suliffinni sulisimavoq, aammali suliffeqarfinni namminersortuni sulisimalluni. Ilisimatusarfimmi sulinermini ilinniakkamik aqutsisutut sulisimavoq, Savalimmiunilu ilisimatusarfiup siulersuisuini ilisimatusarnikkullu siunnersuisoqatigiinni ilaasortaalluni, Ilisimatusarfik tusagassiuutinut taama ilaatigut allappoq, Gestur Hovgaardillu Savalimmiuni inuiaqatigiilerinermik ilinniarsimasut peqatigiiffianni siulittaasuunera aamma nalunaarutigalugu.
