Ilisimatusarfik ilisimatusarnermut immikkoortortanik marlunnik pilersitsilerpoq
- Nukiit atorluarnissaat kisanni aamma fagit assigiinngitsut suleqatigiinnerulernissaat ilisimatusarnermik iluaqutaasinnaasumik aamma ilinniartunut iluaqutaasinnaasumik anguniagaqarnissatsinnut taassuma siunertaraa, Ilisimatusarfimmi rektori Tine Pars oqarpoq.
Inuiaqatigiilerinermik Tusagassiornermillu Ilisimatusarfimmi immikkoortortami ilinniarfiit tassaassapput:
Inuiaqatigiilerinermut Immikkoortortaqarfik, Tusagassiornermut Immikkoortortaqarfik, Isumaginninnermut Immikkoortortaqarfik, kiisalu Aningaasaqarnermut Aqutsinermullu Immikkoortortaqarfik - taanna kingunnerusukkut pilersinneqartussaq.
Oqaasilerinermik, Piorsarsimassulerinermik Oqaluttuarisaanermillu Ilisimatusarfimmi immikkoortortat tassaassapput:
Inuiaat Piorsarsimassusaannut Oqaluttuarisaanermullu Immikkoortortaqarfik, Upperisarsiornermut Immikkoortortaqarfik, Oqaasilerinermut, Atuakkialerinermut Tusagassiuutilerinermullu Immikkoortortaqarfik, kiisalu Nutserinermut Oqaluttanermullu Immikkoortortaqarfik.
Ilisimatusarfiup marlunnik immikkoortortaqalersinneratigut suliassaqarfiit immikkuullarinnerat erseqqinnerulersinneqassasoq, Tine Pars isumaqarpoq.