Ilisimatooq: Uranimut naaggaarluinnarnermut politikkeqarsimanngilaq
Nunani tamalaani politikkikkut ineriartorneq pillugu Danmarkip ilisimatusarfissuani DIIS-mi ilisimatooq post.doc Gry Thomasen Inatsisartut oqaluttuarisaanerannik takussutissanik misissuereerluni taama inerniliivoq. Inatsisartut 2013-mi ukiaanerani ataatsimiinneranni qissattoqarlunilu nuannattoqarpoq, uranimut naaggaarluinnarnermi politikki atorunnaarsinneqarmat. Kisianni ilumut naaggarluinnarnermik politikkimik atorunnaarsitassaqarsimanersoq,
Ilisimatuup post.doc Gry Thomasenip apeqquserpaa. Naaggaarluinnarnermik politikkimut tunngasunik siullermeerluni nanaammattuugaqarsimavoq. Nunatsinni aatsitassarsiorsinnaaneq pillugu kalaallit qallunaallu ataatsimut siunnersuisoqatigiivisa 1988-mi allaaserisaat takugamiuk. Sunnersuisoqatigiilli aalajangiisinnaassuseqanngimmat, taakkua naaggaarluinnarnermik atuutilersitsisuusimanavianngillat.
-Pappiliarpassuit misissoreerpakka, Kalaallillu Nunaannilu uranimut naaggaarluinnarnissamik aalajangertoqarsimanngisaannartoq, misissuinermat inerneraat, post.dog Gry Thomasen taama oqarpoq.
Taassuma erseqqissarpaa, nunannut uranimik tuniniaarusutttunut, matumunnga tunngasumik erseqqilluinartumik politikkeqarnissaq pingaarluinnartuusoq. Nunatsinnilu naaggaarluinnarnermik politikkeqarnersoq erseqqinnginnera ajortumik kinguneqassangitsoq oqaatigaa.
- Nunarsuarmi nunanut allanut qiviaraaanni, Kalaallit Nunaat nunarsuarmi kisimiingilaq taama pisoqarfiusoq. Misissuinerup ersersiinnarpaa qanoq pingaartiginersoq, eqqaamasatta tamanit pigineqartussanngorlugit aaqqiivigineqarsimanissaaq, taamaalilluta politikkut siornatigut qanoq pisoqartarsimanera ilisimaariniassagatsigu, Gry Thomasen oqarpoq.
Taamaakkaluartoq Nunatsinni, naalagaaffeqatigiinilu uranimik tuniniaanissamut piareersarluartugut DIIS-imi ilisimatooq Cindy Vestergaard isumaqarpoq.
- Uani pisoq tassaavoq, allaffissornikkut suliaqartut uranimillu suliaqartut naapeqatigiillutik akisussaassuseqarlutik suleqatigiilluartut, takutillugulu susasasaqartut tamarmik natsorsuutigineqarsinaasumik sulisuusut. Taamaammat sulineq maannamut ajunngila, Cindy Vestergaard oqarpoq.
