Ilisimatooq: Pisiassat akitsoraangata pisisut ikilisarput
Inuussutissat arlaannik pissuteqartumik akii qaffakkaangata, atuisut pisiakinnerulertartut, pisisartut ileqquannik ilisimatooq Københavnip universititianeersoq oqarpoq. Inuussutissallu akitsussasut Pisiffiup pisortaanerata oqaatigaa.
- Akitsuutit qaffappata, qaffaagivineqartut akii akitsussapput. Neqit eqqarsaatigigalugit tamanna isumaqarpoq, nersussuup neqaa 10 koruunimiik kilomut 20 koruunimut qaffaaviussasoq. Taamaammat isumaqarpunga atuisut neqinik pitsaasunik pisinikinnerulerlutik, neqinik aserortikkanik pisiaqarnerulissasut, Per Steen Larsen Pisiffimmi pisortaaneq taama oqarpoq.
Neqit tikisitat akii qaffappata, kalaalliminernik pisinerulissassugut Naalakkersuisut isumaqarput.
Isuma taanna kusanartuusoq Pisiffik isumaqarpoq, kisianni....
- Pisiniartartugut kalaaliminernik neqeroorfigerusuttaqaagut, nioqqutissalli taamaattut suminngaaniit pissanerigut nalulluinnaratsigu ajornartorsiutaavoq, Pisiffiup pisortaanera taama oqarpoq.
Aamma atuaruk Akitsuutit nutaat inuuniarnitsinnut sunniuteqassapput
Tassalu neqit akisunerulernissaat naatsorsuutigisinnaavarput, pisisartuusugullu pisiarisartakkatta tamanna allaannguutigissagaa aamma qularnanngilaq.
København Universitetimi pisisartut pissusaanik ilisimatooq Jørgen Dejgård Jensen oqarpoq.
- Inuussutissat akitsoraangata, atuisut pisinikinnerulertartut misissuinitta arlallit takutippaat. Apeqqutaavorli inuussutissat sorliit pineqarnersut. Ilaasa akii qaffakkaangata atuisut pisinikinnipilussuanngortarput, aammali pisiassat ilaasa akii atuisut atuinerannut apeqqutaaneq ajorpoq, Jørgen Dejgård Jensen taama oqarpoq.
Tassalu pisiassat akii qaffakkaangata pisisartut pissusaat allanngungaatsiartarpoq, pisisartut aningaasanik sipaarusullutik pisiassanik pitsaannginerusunik pisiortulerlutik.
Aamma atuaruk Siumumeersup allap akitsuutinik qaffaaniarneq akerleraa
Neqit akii procentimik ataatsimik qaffakkaangata atuisut procentip affaanik, procentimik ataatsimilluuniik appartartut, misissuinerit takutikkaat, ilisimatooq oqarpoq.
-Assersuutigalugu neqip aalajangersimasup akia qaffakkaanni, atuisut taassuminnga pisinikinnerulertartut, neqinillu akikinnernik pisinerusalerlutik, Københavnip Universitetiani pisisartut pissusaanik ilisimatooq Jørgen Dejgård Jensen oqarpoq.
Kalaallit atuisuisa pissusaanik ilisimatusarsimannginerni ilisimatuup erseqissarpaa.
