Isumaliutissiissummi innersuussutit: Ilisimasanik katersivik, oqaatsivut utoqqatserfigineqarnerlu

Saammaasseqatigiinnissamut isumalioqatigiissitap siulittaasuata tullia, Dorthe Katrine Olsen tikilluaqqusereermat ilaasortat ilaat, Ida Mathiassen paninilu tivapput.

Tamatuma kingorna Dorthe Katrine Olsenip saammaateqatigiinnissamullu isumalioqatigiissitap sammisaasa assigiinngitsut inerneri suliallu ingerlaqqinnissaanut iliuusissatut pilersaarut saqqummiuppai.

Saammaasseqatigiinnissamut isumalioqatigiissitap innuttaasut nammineq tunuliaqutartik oqaluttuassartartillu atorlugit, kinguaariit akornanni inuiaqatigiillu eqimattat assigiinngitsut akornanni saammaasseqatigiittoqarnissaanik sulissuteqarpoq.

Isumalioqatigiissitami inuttaasut akornanni nunasiaataanerup oqaluttuassartaa inuiaqatigiinnilu tamatuma ullutsinni sunniutai assigiinngitsumik paasineqartarnerat tunngavittut eqqarsaataapput. Taamaammat isumalioqatigiissitap ataasiakkaat akornanni ilisimaqarnerulernissaq kiisalu innuttaasut akornanni isiginninneq misigissutsillu pillugu paasinnilluarnerulernissaq sulissutigai.

Innuttaasunit oqariartuutit saqqummiussani Naalakkersuisunullu tunniunneqartuni innersuussutini arfineq-marlunni kalaallisut oqaatsitta pitsanngorsarnissaat eqqaaneqarpoq. Oqaluttuarisaanermut saammaasseqatigiinnermullu ilisimasat pillugit katersivik kiisalu utoqqatserfigineqarnissamik kissaateqarneq innersuussutinut ilaapput.

Isumaliutissiissut tamaat uani atuaruk

Sara Olsvig Naalakkersuisut sinnerlugit isumaliutissiissutit tigugartorlugit peqataasup angusat nuannaarutigai isumalioqatigiissitamillu suliarineqartut nersualaarutigai.

Naggataatigulli nipilersortartut Nanook nipilersukkamik appisimaarput, tassani innuttaasuni saammaasseqatigiinnissaq pillugu taallaq nutaaq ’Ilunniittuassavoq’ atorlugu. Tallaq pillugu annerusumik uani atuagaqarsinnaallutillu erinarsuut tusarnaarsinnaavat.