Ilisimasalik: Kalalit Nunaata russit siorasaarutaat siooragissanngilaat
Russit nunanut allanut isumannaallisaanermullu politikkiannut immikkut ilisimasalik danskiusoq taama oqarpoq.
Danmarkimi russit aallartitaat sapaatip akunnerata naanerani mianersoqqusivoq, danskit sorsuutaat russit qaartartumeersinnaangaat, Danmark illersoqatigiinnut ilanngutissappat.
- Russit aallartitaata taama nalunaaruteqarnera ulluinnarsiutaanngilaq.
Naalagaaffiit pissusiinik ilisimatusarsimasoq Aarhusip Ilisimatusarfiani lektori Mette Skak, Russit nunanut allanut politikkiat pillugu immikkut ilisimatusarsimasoq, politikeritulli arlalittut sapaatip akunnerata naanerani nalunaarutigineqartoq tupaallaatigaa.
Russit Danmarkimi aallartitaat, Mikhail Vanins, Jyllands-Postenimi allaatigisaqarpoq, Danmark sorsuutimini raketilersuissaguni Ruslandimut attaveqarnermi tungaatigut assut navianartorsiussasoq.
Raketit illersuutaasussaapput nunanut peqqarniisaarnianik illersuisunut soorlu Korea Avannarlermut, Iranimut peqqarniisaarniaqatigiiffimullu IS-imut.
Aamma atuaruk Olsvig: Russit aallartitaata oqaasii akuersaarnanngillat
Ruslandilli tamanna allatut paasisimagaa, Mette Skak isumaqarpoq.
- Russit Kitaamiullu akornanni pissutsit maanna ajorluinnarput, imaappoq qanorluunniit NATO iliuuseqaraluarpat, russit tungaanniit Russit soqutigisaannut akerliuniarnertut paasineqassaaq.
Issittumi Kalaallit Nunaata Russinut attaveqarnera qanoq issava, Danmark NATO-mi qaartartunut ungasissumut ingeriuttakkanut illersoqatigiinnut peqataassappat? Apeqqutigaarput.
- Aallartitap atomimik sakkussianik eqqorneqartussatut taasai tassaapput danskit sorsuutaat, qaartartunut ungasisumut ingeriuttakkanut illersoqatigiinnut peqataasut. Tassaapput NATO'p illersuutai ingerlasinnaasut. Allatut oqaatigalugu, issittormiuunngitsunut ajornartorsiutaapput qunusaarutaallutillu.
Mette Skakili naapertorlugu Ruslandimiit mianersoqqussut pingaaruteqanngitsutut isigineqassanngilaq.
Ruslandilli maannamut immikkut eqqissisimanerusumillu Issittumut pissuseqarpoq - soorlu Ilulissani isumaqatigiissummi 2008-meersumi isumaqatigiittoqarsimasoq:
- Naamik ajornartorsiut soorunami ima isikkoqarpoq, Ruslandip piumasaminiunerusoq suut tamaasa akulerussuunniarsarai. NATO-lli Danmarkillu namminneq immikkoortiterineq pikkoriffigaat, taamaattumik russit nalunaaruteqarnerat Kalaallit Nunaanni aarlerissutigisariaqanngitsoq, taanna isumaqarpoq.
NATO'p kitaani naalagaanersaata oqaatigaa Danmarkip Ruslandimiit saassunneqarnissani aarlerigissanngikkaa. Danskit nunanut allanut tunngasunut ministeriata, Inuit Ataqatigiillu siulittaasuata Sara Olsvigip russit aallartitaata oqaaseqaatai akuerineqarsinnaangitsutut oqaatiginikuuaat.
