Ilinniartut sungiusarfissaat amerlisarniarneqalerput
Ilinniartut suliffimmik sungiusarfissaannik amigaateqarneq pimoorullugu Piginnaasat ineriartortinnissaat pillugu siunnersuisoqatigiini iliuuseqarfiginiarneqalerpoq.
Piffissami qaangiuttumi ilinniartut sungiusaammik suliffissaqanngittarnerat radioaviisikkut saammineqangaatsiareersimavoq. Ajornartorsiutillu qangalili ilisimaneqartup qanoq iliuuseqarfiginissaa tullinnguuttoq, piginnaasat ineriartortinneqarnissaat pillugu siunnersuisoqatigiinni siulittaasunngoqqammersoq Ulla Lynge oqarpoq.
Aamma oqaatigaa tamanna pillugu ilisimasat naammareermata qanoq iliuuseqarnissamut aningaasanik qinnuteqartoqarsimasoq, tamannalu inatsisartut aningaasanut inatsisissaani allaqqammat, inatsisartut akuerissaneraat kisimi apeqqutaaginnassasoq.
Sungiusaatigalugu suliffissat amerlisarniarneqarput, illuatungeriillu, ilinniarfiit suliffeqarfiillu paasititsiniaaffigineqassallutik, Ulla Lynge oqarpoq.
Ilinniartut sungiusarfissaasa amerlisarnissaat suliniutigineqassaaq, naalakkersuisunillu inassuteqaatit timitalerniarneqartussanngussapput.
- Paasissutissat ilisimasallu ersarissarneqassapput suliniutillu aningaasartaat qaqugu tunniunneqassanersut apeqqutaalerpoq, Piginnaasat ineriartortinnissaat pillugu siunnersuisoqatigiinni siulittaasunngoqqammersoq Ulla Lynge taamak oqarpoq.
Siunnersuisoqatigiit Naalakkersuisuniit upernaaq maajimi pilersinneqarput, misissuinermi paasineqarmat nunatsinni sulisinnaasut 70 procentii ilinniagaqarsimasuungitsut.
