Ilinniartut saaffigisartagassaannik Danmarkimi pilersitsinissaq anguniarneqartoq

Isumaqatigiissusiornermi ilinniartut saaffigisartagassaannik pilersitsinissaq ilaatigut anguniarneqartoq, Aalborgip Kommuniani borgmesteri, Thomas Kastrup-Larsenip oqaatigaa.

- Kalaallit ilinniagaqartut ilinniakkaminnik naammassinninnissaannik ikiorseerusuppugut, taamaalilluta ilinniartut maaniinnerminni ajortumik misigisaqaratik nuannersunik misigisaqarnissaat anguniarlutigu, Aalborgip kommuniani borgmesteri Thomas Kastrup-Larsen oqarpoq.

Kalaallit Aalborgimi ilinniagaqartut ulluinnarni pisariaqartitaannik ikiorneqartassapput, soorlu danskit ilinniagarnermi inatsisaat qanoq aaqqissugaanersut paasissutissiissutigineqartassallutik aamma pisariaqartinneqartunik allanik ikiorserneqartassallutik.

Taamalu pilersaaruteqarneq Danmarkimi ilinniagaqartut kattuffiannit, Avalammit nuannaarutigineqarpoq.

- Tamanna kissaatigineqartutut ilinniartunut iluaqutaasinnaappat nuannaarutigiinnarsinnaavarput, Avalaap siulittaasua Bjørk Lange Kristensen oqarpoq, naqissuserlugulu oqarluni, nuannaarutigigamiuk Aalborgip kommuniata kalaallit ilinniagaqartut ulluinnarni atuareernerminni aamma suliffeqarfinni sulisarnissaannik ikiorniarlugit isumaqatigiissusiormata.

- Ilisimavarput ilinniarnerup nalaani suliffeqarfinni sulisarneq qanoq ilinniartumut pitsaatigisarnersoq, tassami taamaaliornikkut ilinniarnerup avataani pissutsit piviusut aamma ilikkagaqarfigineqartarmata, Bjørk Lange Kristensen oqarpoq.

Kalaallit Aalborgimi ilinniagaqartut amerlanerit ilinniakkaminnik naammassinnittarnissaat, Aalborg Kommunip Kommuneqarfik Sermersuullu isumaqatigiissusiorneranni anguniarneqarpoq.

- Danmarkimi ilinniagaqareernermi Kalaallit Nunaannut utertarnissaq siunertaavoq tassami ilinniarluarsimasunik pitsaasunillu sakkussaqarluartunik maani atorfissaqartitsisoqarmat. Tamannalu angugaanni Kalaallit Nunaanni inerisaaqataasinnaanissaq aamma anguneqartussaalluni.