Ilinniartitsisut piumasaqaataat kommuninit marlunnit soqutigineqarpoq
Ulluni makkunani oqaatsitigut atuartitsinerup pitsaassusaata oqallisigineqarnerani ilinniartitsisut kattuffiata siunnersuutaat kommuninit marlunnit tusaaniarneqarput. Taanna qallunaatut tuluttullu ilinniartitsinernut pikkorissinissamut ilinniartitsisunik ilinniartitseqqittarnissamut tunngasuuvoq.
- Ilimagaara oqaatsitigut ilinniartitsinermut tunngatillugu kommunit allat assigalugit unammillernartunik atugaqartugut. Tassaavorlu atuartut meeqqat atuarfianni atualerneraniit ilinniaqqinnissaasa tungaannut malinnaasunik ilinniarsimasunik atuartitsisoqarnissaq, Henrik Soloy taama oqarpoq.
Kujasinnerusumi Kommuni Kujallermi atuartut amerlassusaat tunngavigalugit ilinniartitsisukinnerpaajusumi, Meeqqat atuarfiani angusarlunnerpaajusarput.
Qallunaatut tuluttullu ilinniartitsisussaaleqipput
2012-miilli tamanna mumisinniarlugu atuarfeqarfinni oqallisigineqalerpoq ajunngitsumillu kinguneqartoq, Meeqqanut kultureqarnermullu ingerlatsivimmi pisortoq Jens Korneliussen taama oqarpoq. Qallunaatut tuluttullu ilinniartitsiniarnermi qallunaat sulilersinnissaat ajornartarnerat ajornartorsiutaanerpaavoq, taassuma oqaatigaa.
- Isumaqarpunga qallunaatut tuluttullu oqaatsinik ajornatorsiuteqartugut nunatsinni, aamma maani Kommune Kujallermi. Taakkulu aamma ajornartorsiutaanerat imatut tunuliaqutaqarsinnaavoq ukiorpassuanngortuni qallunaatut oqalussinnaaneq annertuumik soqutigineqarsimanngimmat.
- Ilimanarsinnaavoq ilinniartitsisut aamma piginnaasaat ullumikkut taakkunani oqaatsini atuartitsinermi, tuluttullu atuartitsinermi, pitsaanerusinnaanissaat taanna miserratigineqarsinnaanavianngilaq. Kisiannili tassa ullumikkut ilinniartitsisunngortartut Ilinniarfissuarminngaanniit tikisittakkagut ilisimasaqartorujussuullutik takkuttarput. Kommuni Kujallermi meeqqanut kultureqarnermullu ingerlatsivimmi pisortaq Jens Korneliussen taama oqarpoq.
Ilinniartitsisut ikippallaarnerat ullumikkut ajornartorsiutaasunut peqqutaanngilaq, taamaattumik qallunaatut tuluttullu ilinniartitsisinnaanermut pikkorissarneq isumassarsiaalluarpoq. Ilinniartitsisut meeqqat atuarfianneersut kattuffiani IMAK-mi siulittaasoq Sivso Dorphip tamanna ippassaq siunnersuutigaa.
Oqaatsitigut pikkorissarneq isumassarsiaalluarpoq
Oqaatsitigut pikkorissarnerit amerlanerusut isumassarsiaalluartoq kommunit marluk ullumikkut oqaatigaat.
- Sivsop siunnersuutaa soqutiginarpoq, qallunaatut tuluttullu ilinniartitsinernut pikkorissarnissanut periarfissaasut misissussavagut, Qeqqata Kommunianiit Henrik Soloy taama oqarpoq.
Kommuneqarfik Sermersuumilu ilinniartitsisunut ilinniaqqinnissamut pilersaarutit kingulliit naammassineqaleruttorput, Meeqqanut, Ilaqutariinnut atuarfeqarnermilu pisortap, Søren Valbakip tamanna pilersaarnermini eqqarsaatigissallugu oqaatigaa.
- Ilinniartitsissutit sumiiffinnilu pisariaqartinneqartut qaffassarnissaat pilersaarusiami uani aamma ilaatinneqassapput, Søren Valbak KNR-mut oqarpoq.
- Meeqqat tamarmik ilinniaqqinnissaminnut ingerlariaqqissinnaanissaannut periarfissaqalersillugit ilinniartinnissaat pisariaqarpoq.
Nunatsinni kommuninit pingasunit taama oqarput. Kingulliulluni oqaaseqarpoq, Kommuneqarfik Sermersuumi Meeqqanut ilaqutariinnut atuarfeqarnermullu pisortaq Søren Valbak.
