Ilinniartitsisoq: Inatsisartunngortussat Atuarfitsialak puigussanngilaat
Nuummi Kangillinnguit Atuarfianni ilinniartitsisoq Lone Kokholm taama oqarpoq:
- Atuartut naammassisut 15-it 16-illu akornanni ukioqartarput, amerlasuullu qinnuteqaraangamik tiguneqartarlutik efterskolinut, GU-mut assigisaannullu, kisianni periarfissaqarpianngitsunik aamma ilaqartarput. Taakku ineriartornissaminnut periarfissaqartariaqarput, 11.klassilu taanna atorunnaartoq periarfissaasariaqarpoq, Lone Kokholm Radioaviisimut oqarpoq.
Taanna ilinniartitsisutut ukiuni 23-ni sulereerpoq, Nuummilu Kangillinnguit Atuarfianni ilinniartitsisutut maanna atorfeqarluni. Atuarfiit pioreersut pitsanngorsaavigineqarnissaat taassuma ujartorpaa, qarasaasiat, issiaviit, nerriviit atortullu allat ullutsinnut naleqqussarneqartariaqartut oqaatigalugu, soorlu aamma atuakkat ilinniutit atorneqartartut ullutsinnut naleqqussartariaqarsorigai.
Atuartut aamma nerisaqartinneqarnissaat pingaaruteqartoq Lone Kokholmip oqaatigaa. Angajoqqaat meeqqamminnik malinnaajuartariaqarput, inatsisartunngorumaartussallu atuarfeqarfinnik pitsanngorsaaniarnerminni oqaluinnaratik timitaliisariaqarput:
- Angajoqqaat malinnaanerunissaat kissaatiginartuaannarpoq, soorunalumi malinnaasoqarluni, kisianni aamma angajoqqaaqarpoq piffissaalatsitsisunik, immaqalu aamma soqutiginninnerusinnaasunik peqarluni. Taamaammat ilinniartitsisut angajoqqaallu suleqatigiittariaqarput. Ilinniartitaaneq oqallisaajuarpoq, taamaammat tamanna ajunngeqaaq aamma pitsaaqaaq, kisianni inatsisartunut oqaasiinnaanani timitaqartariaqarpoq, Nuummi Kanguillinnguit Atuarfianni ilinniartitsisoq Lone Kokholm taama oqarpoq.
Suliffeqarfiit peqatigiiffiillu Inatsisartunut qinersinissaq sioqqullugu Radioaviisimit paasiniaaviginiarpagut, Nunatsinni pissutsit qanoq pitsanngorsarneqarsinnaanersut paasiniarlugu.
