Ilinniarneq

Ilinniarnertuunngorniarneq timersornertalik soqutigineqarluarpoq

Qeqqani Ilinniarnertuunngorniarfiup Elite Sport Greenland Kalaallit Nunaanni Timersoqatigiiffiit Kattuffiat suleqatigalugit, ilinniarnermut atatillugu timersorneq fagitut ilinniartitsissutinut ilanngunneqarpoq.

Allattoq Andrea Christiansen, Jaaku Lyberth

juulip 31-at 2015 05:47

Ilinniarnertuunngorniaatigaluni timersorneq ukiunik sisamanik sivisussuseqassaaq, inuusuttullu tassunga soqutiginnilluarsimasut, Kalaallit Nunaanni Timersoqatigiiffiit Kattuffianit oqaatigineqarpoq.

- Ukiuni sisamani ilinniartuunngorniarnermi timersorneq ilinniartitsissutigineqassaaq. Inuusuttut timersortartut 26-it aallarniutaasumik ilinniartuunngorniarnerfimmi aallartissapput. Taakkunani 14-it isikkamik arsaattartuuuput, qulingiluat assammik arsartartut, sinneri timersuutinit soorlu sulorarneq, Tae Kwon do ujakkaarnerlu, Kalaallit Nunaanni Timersoqatigiiffiit Kattuffiani ineriartortitsinermut siunnersorti, Aviaaja Geisler oqaluttuarpoq.

Ilinniarnertuunngorniartussat timersorusupput

Ilinniarnertuunngorniartut timersornermik soqutiginninnerat tupaallannarpoq, tamannalu pisariaqartinneqarsimasoq ersertoq, Aviaaja Geisler oqarpoq.

- Kisitsisit taakku takutippaat soqutigineqartorujussuusoq, aammalu peqqinneq timersornerlu pingaartinneqartut.

Aammalu timersornermik piginnaasaqarluartut timersornermik aallussaqaannarusupput ilinniagaqarusullutillu, Aviaaja Geislerip oqaatigaa.

Elite Sport Greenlandip toqqagai timersornermi sungiusaasut marluk, Qeqqani Ilinniarnertuunngorniarfimmi, Nuummiittumi, sungiusaasussatut atorfinitsinneqarput.

Aamma atuaruk Nunani allani ilinniarsinnaasut ikilisinneqarput

Ilinniartuunngorniallu ilinniarnerminni kinguaattuunngikkaluarlutik sinerissami nuna tamakkerlugu unammersuarnernut anngunniunnernut sungiusarnernullu maanna peqataasinnaassapput.

- Ukiuni sisamani ilinniartuunngorniartussaagamik piffissaqarput periarfissaqarlutillu pissartanngorniunnissanut unammiuaarnissanullu assigiinngitsunut. Soorlu pissartanngorniunnernut peqataasinnaapput timersuutillu allat takkuttut peqataaffigisinnaavaat, Kalaallit Nunaanni Timersoqatigiiffiit Kattuffiani ineriartortitsinermut siunnersorti, Aviaaja Geisler oqaluttuarpoq.

Qeqqani Ilinniarnertuunngorniarfimmi timersuutit makku toqqagassaapput; Assammik arsarneq, isikkamik arsaanneq, nalunneq, arpanneq, paaneq (kampsport), sulorarneq, tilluunneq, sisorarneq, qajartorneq, nerrivimmi arsaararneq aammalu volleybolderneq.

Aamma atuaruk 2022-mi ukiukkut OL-erfissaq aqagu toqqarneqassaaq