Ilinniarnertuunngorniarneq qarasaasiakkut ingerlanneqarsinnaasoq periarfissaalissagunartoq
Ilinniartitaanerup iluani suliniutitut nutaatut Naalakkersuisut neriuutigaat Sisimiuni ilinniarnertuunngorniarfik ukiup atuarfiusup 2019/2020-ip aallartinnerani ilinniartunut nutaanut neqeroorsinnaalernissaa atuartunut ilinniarnertuunngorniarnissamut piareersarfiusumik ilinniarnermi ukiunik marlunnik sivisussusilimmi aamma naliginnaasumik ilinniarnertuunngorniarnermi ukiunik pingasunik sivisussusilimmi qarasaasiaq iluaqutigalugu angerlarsimaffimminni ilinniarlutik aallartissinnaanissaannut.
Tamanna Inatsisartuni ilaasortap Inuit Ataqatigiinnersup, Mikivsuk Thomassenip, §37 naapertorlugu isorliunerusuni ilinniartitaanernut tunngatillugu Naalakkersuisunut apeqquteqaataanut akissummi erserpoq.
- Ilinniarnertuunngorniarnermik qarasaasiakkut ingerlanneqartumik neqerooruteqarsinnaanermi aamma assersuutigalugu ilinniartut immikkut pisariaqartitallit neqeroorfigineqarsinnaapput, tassami ilinniarnertuunngorniarfinni ilinniarneq ilusilersorluakkamik ingerlanneqartarmat aamma ilinniarneq naliginnaasoq malinnagu najuunnissaq pisariaqartinneqanngimmat, Vivian Motzfeldt Mikivsuk Thomassenip §37 naapertorlugu apeqqutaanut ilaatigut taama akissuteqarpoq.
Vivian Motzfeldtip ilanngullugu ilisimatitsissutigivaa eGUX taamaalilluni GUX-S-imik misiliinermut tapertaalersoq, tassani ilinniartunut immikkut pisariaqartitalinnut ilinniarnertuunngorniarnermik pilersitsinissaq sulissutigineqarluni.
- eGUX-imi misilittagaalersut, annerusumillu najugaq qimannagu ilinniarnerit ineriartortitsiffiunissaat siunertaralugu ilinniartoqarfinni allani atorneqarsinnaalersillugit, Vivian Motzfeldt ilaatigut taama allappoq.
Vivian Motzfeldt akissuteqaammini aamma ilisimatitsivoq Sisimiuni eGUX-imi misiligutitut ilinniarnermik aallartitsisoqarsimasoq. Taamatut misiliinermi Sisimiuni ilinniarnertuunngorniarfiup 2018-imi septembarimi aallartereersumik ilinniarnertuunngorniarnermut ilaasumik qarasaasiatigut ilinniarnertut ittut ilassutitut ilinniarnerit aamma ilinniarnerit ataasiakkaat arlallit neqeroorutiginiarpai.
