Ilinniarneq imminut akilersinnaasoq

Ilinniarneq imminut akilersinnaavoq. Naatsorsueqqissaartarfiup nunatsinni inuit isertitaat ukiut qulingajanni alaatsinaappai, siornamullu kisitsisit maanna saqqummersinneqareerput. Inuillu qaffasissumik ilinniagallit tupaallaatissaanngitsumik isertitaqarnerupput.
Allattoq Ivik Kristiansen
novembarip 01-at 2017 14:50

Ingerlaqqillutik ilinniagallit meeqqat atuarfiini atuarnermik naammassisaqaannartunit  marloriaammit amerlanerungaartunik siorna isertitaqarput.

Tassami Ingerlaqqillutik ilinniagallit akileraartinnatik agguaqatigiisillugit 472.000 koruuningajannik siorna isertitaqartut, meeqqallu atuarfiiniinnaq atuarnermik naammassisallit 178.000 koruuningajannik ukioq taanna isertitaqartut Naatsorsueqqissaartarfiup kisitsisaataasa takutippaat.

AAMMA ATUARUK Aningaasaateqarnerulersimavugut

Inuussutissarsiutinut ilinniagallit akileraartinnatik agguaqatigiisillugit 312.000 koruuninik isertitaqarlutik akissarsiaqqortunerpaanut tulliupput.

Taakku ingerlaqqillutillu ilinniagallit nunatsinni inuit siorna isertitaasa agguaqatigiissinnerannik qaffaapput.

Nunatsinni najugallit akileraartinnatik siorna isertitaat agguaqatigiisillugit 240.000 koruuningajaapput.

Ilinniarnertuunngorniarfinniit allagartallit akileraartinnatik siorna isertitaat agguaqatigiisillugit 231.000 koruuninit amerlanerulaarput, qaffassarlutillu pikkorissarnermik naammassisallit agguaqatigiisillugit 208.000 koruuninit amerlanerusunik isertitaqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq