Kollegiassaaleqineq: Ilinnialersussat 22-t aallartinnissaat qularnartoq

Ilisimatusarfimmi ilinnialersussatut akuerisaasut ukiormanna 205-iupput, ilinniartulli inissaannik amigaateqarneq pissutigalugu, 20-t inissaqartinneqanngillat.

AAMMA ATUARUK Inatsisilerituunngorniarneq nutaaq soqutigineqarluartoq

Tamanna Ilisimatusarfimmi rektorip Gitte Adler Reimerip uggornartippaa. 

- Uggornartupilussuuvoq ilinniaqqinnissaminnut akuerisaasimasut, ilinniarusungaarlutik pilerigisaminnut ilinniarusutaminnut aallartitsisinnaanngitsut, nunatsinnilu ilinniarsimasunik amigaateqarluta suaaruteqartuarpugut,  taavalu inissaaleqineq pissutigalugu ilinniarnerminnik aallartitsisinnaanngimmata uggornartupilussuuvoq, Gitte Adler Reimer taama oqarpoq. 

AAMMA ATUARUK Ilisimatusarfik pisortartaartoq

Ilisimatusarfimmi ilinniartunik sullissisup Line Ellemann Høeghip oqarnera naapertorlugu, ilinnialernissaminnik akuerisaasut ilaqutallit 20-t missaannik amerlatigisut kollegiani inissaqanngillat, taamaanneralu Ilisimatusarfimmi rektorip uppernarsarpaa. 

 - Ukiormanna, ukioq kingullertut malunnarpoq ilinniartut ilaqutallit kollegiani inissaaleqinermik ajornartorsiuteqartut, Gitte Adler Reimer oqarpoq.

Ilinniarfiit ilinniartut inissaannik najugaqarfissaannilluunniit innersuussisinnaanngillat, tamanna Namminersorlutik Oqartussat ilinniartut ineqarfiisa allaffeqarfiata KAF-ip  isumagisarpaa, kollegianillu amigaateqarneq Ilisimatusarfimmi rektorimit pakatsinartinneqarpoq kollegianilu nutaanik sanaartortoqarnissaa neriuutigineqarluni. 

AAMMA ATUARUK Isumaginninnermut siunnersortitut ilinniarfik soqutigineqaqisoq

- Ilinniartut inissaannik sanaartortoqarnissaa imaluunniit piaarnerpaamik iliuuseqartoqarnissaa Ilisimatusarfimmit neriuutigeqaarput, neriulluta aamma tamanna aaqqinneqassasoq piffissami ungasinngitsumi, Ilisimatusarfimmi rektori Gitte Adler Reimer oqarpoq.

Aviisip Sermitsiap allaaserisaa naapertorlugu ilinniartut 80-it Nuummi  kollegiamik inissiamilluunniit pissarsiniartut utaqqisuniipput.

Tamanna pillugu KNR Namminersorlutik Oqartussanut attaveqarpoq, sulilu akissutissarsisimanani.