Speciale: Ilinniagartuut qanoq iliorluni pigiinnarneqarsinnaappat?
Tamakku Aalborgip Universitetiani, AAU-mi, specialiliami angusat ilagigaat, atuagassiaq AAU Matchmaker allaaserisaqarpoq.
Specialiliortup, Verena Huppertip, Arctic Studiesimeersup Nuuk aamma Canadami illoqarfik Charlottetown naleqqiullugit misissuiffigisimavai.
Illoqarfinni taakkunani marlunni ilinniagartuunik sulisussarsinissaq sulisoriinnarnissaallu ajornakusoortinneqarpoq. Inuusuttut illoqarfitik qimallugit ilinniariartortarput uteqqinnatillu, imaluunniit illoqarfigisaminni ilinniagaqarsinnarlutik allamut suliffissarsiortarlutik.
Suliniummi aamma ilinniagartoortatta meeqqamik paaqqinnittarfissaqannginnerat imaluunniit inissaaleqinertik pissutigalugu Nunatsinni sulinissaq toqqarneq-ajoraat. Aammali sulinermi atukkat sulinermilu tamaviaartitaasarneq akisussaaffeqarpallaarnerlu pissutaaqataapput.
Ajornartorsiutigineqartullu ilaasa aaqqiissuteqarfiginissaannut Verena Huppert aamma siunnersuutissaqarpoq. Charlottetownimi sulisussarsiornermik sulisullu pigiinnarnissaannik suliaqarfiusumik immikkut naalakkersuisoqarfeqarpoq, tamannalu Nunatsinnit ilinniarfigilluarneqarsinnaagunartoq, Verena Huppert isumaqarpoq.
Aamma Nuummi pitsaasumik suliniuteqartoqarpoq, tassalu ilinniagaqartut aasaanerani suliffissaannik neqeroorfigineqartarlutik. Ilinniagaqartut taamaalillutik Nunatsinni inuussutissarsiornerup iluani misilittagaqalersarput attaveqarfissaqalerlutillu, tamannalu siunissami suliffissamik toqqaanissamut sunniuteqarsinnaasoq, Verena Huppert isumaqarpoq.
Aningaasatigulli ajunngitsorsiassanik pilerisaaruteqarneq sunniuteqarpallaarsorinngilaa. Namminersorlutik Oqartussat ilaatigut ilinniartut Nunatsinnut nuunnerini ilinniarnermi taarsigassarsiarineqartut akilersornissaannik ikiuisarput Canadamilu suleqatissamik pissarsisut 1000 dollarsinik akilerneqartarlutik. Tamakkuli iluaqutaarpianngitsut, specialiliortoq isumaqarpoq.
