Folketingimut qinersineq 2015 Ili Ili qinigassanngortittunut Ilimmarfimmi oqallitsitsilerpoq
Ilinniagaqartut peqatigiiffiat Ili Ili, ualimut sisamanut Nuummi Ilimmarfimmi folketingimut qinigassanngortittunut oqallitsitsilerpoq.
Oqallitsitsinermi ilinniagaqartut atugaat naalagaaffeqatigiinnerlu oqallisigineqassapput.
Allattoq Malu Pedersen
juunip 11-at 2015 14:28
Inuit amerlanerit peqataanissaat siunertaralugu, peqatigiiffik nutaamik allaanerusumillu iliuuseqarniarpoq. Sunali iliuuseriniarneraat peqatigiiffiup siulittaasuata Vivi Voldip oqaatigerusunngilaa inuilli tusarnaariarunik paasiumaaraat oqaatigalugu.
Siumumiit Martha Abelsen Erik Jensenilu, IA-miit Muté Bourup Egede Aaja Chemnitz Larsenilu , Demokraatinit Randi Vestergaard Evaldsen Aputsiaq Olsen Jonathansenilu , Atassummit Steen Lynge Jonas Nilssonilu kiisalu Partii naleqqamiit Per Rosing Petersen aamma Dan Rasmussen peqataassapput.
Oqallinneq qallunaatut kalaallisullu toqqaannartumik nutserisoqassaaq.
Kikkut tamarmik tikilluaqqusaapput.
