Ileqqoreqqusat allanngortinneqarnissaat kommuninit angumerineqarsinnaanngilaq

Ileqqoreqqusat suli allanngortinneqannginnerinut pissutsit arlaqartut kommininit nassuiaatigineqarput.

Qaasuitsup Komminiani borgmesterip, Ole Dorphip nassuiaataasa ilagaat, ileqqoreqqusat nutarsarneqarneri immikkoortitsernerilu suli naammassineqanngimmata aamma kommunimi innuttaaasut qangali piumasarisaat, tassa kommunerujussuup arlalinnut avinneqarnissaanik kissaateqarnerat pissutigalugu ileqqoreqqusat naammassineqarnissaat utaqqimaaqqaarsimagamikku.

Qeqqatali Kommunia allaanermik nassuiaateqarpoq. Kommunip pisortaanerata, Panêraq Olsenip naqissuserpaa, ileqqoreqqusat kommunalbestyrelsemit aalajangersarneqareernerisigut taakku Namminersorlutik Oqartussanut nassiutereerneranni tassani arriisaarunneqartarneri pissutaaqataasartoq.

- Nassiussagut tassani misissorneqartarput tamatumalu kingorna ileqqoreqqusat uangutsinnut uterteqqinneqartarlutik tamatumalu kingorna kommunimi suliarineqareernerisa kingorna aamma Namminersorlutik Oqartussanut uterteqqinneqartarlutik. Tassa suleqatigiinneq taama ingerlanneqartarpoq. Taamaattumik suliaq ukiut arlallit ingerlanneqarsinnaasarpoq.

Panêraq Olsen aamma oqarpoq, kommunit sisamaannanngortinneqarnerisa kinguneranik ileqqoreqqusat allanngortinneqarnissaat pillugit suliaq annertuupilussuusimasoq.

Kommuneqarfik Sermersuup tamassumunnga nassuiaataa aamma allaaneruvoq.

- Siullermik ajuusaarutigissavara ileqqoreqqusat allanngortinneqarnissaannut piffissaq taama sivisutigisoq atorismagatsigu. Kisianni tamassumunnga pissutaanerusoq tassaaneruvoq, kommunimi sulisut ilaatigut taarseraassimanerujussui ingammik teknikkikkut ingerlatsiviit eqqarsaatigalugit.

Kommuneqarfik Sermersuumi borgmesteriugallartoq, Justus Hansen taama oqarpoq imalu aamma nassuiaateqaqqilluni.

- Tamassumunnga nassuiaataasinnaasoq aamma unaavoq, tassa kommunimi sumiiffiit arlaqartut assigiinngitsunik ilioriuseqartarmata. Soorlu qanga Angmassalik kommuniata nunami angallannikkut ileqqoreqqusaat kitaanut naleeqqiullugit allaanerummata taamatullu kangerlunni piniarnikkut aalisarnikkullu ileqqoreqqusat aamma kitaanut naleqqiullugit allaannerullutik.

Kommuneqarfik Sermersuumi borgmesteriugallartoq, Justus Hansen taama oqarpoq.

Kommunini ileqqoreqqusat nutarterneqarnissaat pillugit Kommuni Kujallermi borgmesteri oqaaseqartinniaraluarparput tamannali iluatsinnatigu.

Kommuninut ileqqoreqqusat kommunini innuttaasunut atuutsinneqartarput. Soorlu assersuutigalugit uku taaneqarsinnaapput. Qimmit nunap immikkortuaniit allamut nuunneqarnerini qimmit kinguaassiortinneqarsinnaajunnaarsinneqarnerinut tunngassuteqarsinnaalluni. Nunami qamuteralaat atorlugit angallannernut tunngassuteqarsinnaallutik aamma sumiiffinni qaammatini aalajangersimasuni umimmanniarnissanut tunngassuteqarsinnaasarlutik.