Ilaqutariit Inuit pinngitsaalillugit nuutsitaanerat atuakkiarineqartoq
Qatanngutigiinniat nunaqarfianni Hebronimi ukiut 58-it matuma siorna poorskip sapaataani naalagiaqatigiinnermi, nunaqarfeeqqap qimanneqarnissaa nalunaarutigineqarmat innuttaasunit tupaallaatigineqaqaaq.
Hebron 1831-mi tunngavilerneqarpoq matuneqarnissaatalu tungaanut naggueqatigiit Inuit ilaqutariit 51-it tassani najugaqarput, taakkulu nunaqarfiup matuneqarnissaa pillugu tusarniarneqaratillu oqaasissaqartitaasimanngillat, Paggivittami naalakkersuisut qatanngutigiinniallu nunaqarfiup matuneqarnissaanik aalajangeereersimammata.
Pinngitsaaliissummik nuutsitsineq pillugu atuakkiaq “Dispossessed” Montrealimi sapaatit-akunneranni uani saqqummersinneqarpoq.
Ilaqutariit avissaartitaasut
Atuakkiortup, Carol Brice-Bennettip, KNR-imut oqaatigaa naggueqatigiit Inuit Hebronimeersut ilaquttaminnit avissaartitaallutik Paggivittaq tamakkerlugu siammarneqarlutik nuutsitaasimasut, naak nuuffigisaminni ilisarisimasaqanngikkaluartut aammalu aalisarnissamut piniarnissamullu periarfissat nalugaluaraat.
Nuutsitaasut ilarpassuisa taamatut pineqarnertik inuunermik sinnerani sunnerneqaatigaat.
Sophie Keelan, qulingiluaannarnik ukioqarluni Hebronimit nuutsitaasoq KNR-imut oqaluttuarpoq Inuttut qatanngutigiinniatullu kinaassutsini annaasimallugu.
Aamma oqaluttuarpoq Hebron ukiut tamaasa uterfigisarlugu, meeraalluni nuutsitaannginnermini pinnguarfigisarsimani kinaassutsini misigeqqikkumallugu.
Atuagaq tuluttoortoq uani akeqanngitsumik aaneqarsinnaavoq.