Ilaqutariit atornerluinermik ajornartorsiuteqartut Sanningasup Tungujortup suliniuteqarfigilerai
39-nik ukiulik Nivé Heilmann suliniummik aqutsisussatut atorfinitsinneqarpoq. Nivé Heilmannip ukiumik ataatsimik sivisussusilimmik aallaqqaammut sulinissaa isumaqatigiissutigineqarpoq, naak suliniutip sivisunerusumik atuussinnaanissaa Sanningasoq Tungujortumit siunniunneqaraluartoq.
Sanningasoq Tungujortumi nammineq kajumissutsiminnik sulisut ilaqutariinnik meerartalinnik imigassamillu ajornartorsiutilinnik sullissinissaannut Nivé Heilmann pikkorissaasuussaaq.
Nivé Heilmannip sulinera Aalborgimi Barnets Blå Husimi aallartissaaq, qaammatini pingasuni tassani sulissalluni. Blå Kors Danmarkip sulinera pillugu annerusumik ilisimasaqalernissaa matumani siunertaavoq.
Nivé Heilmannillu suliassaminut pisinnaasaqarluarpoq.
Meeqqat Inuunerissut nuna tamakkerlugu suliniutaanik "Som ringe i vandet"-imik taaguutilimmi aqutsisuuvoq, meeqqat kinguaassiutitigut atornerlunneqartarnerannut pinaveersaartitsinissaq pillugu suliniummut aqutsisuulluni. Suliniut Nunatsinni illoqarfinni qulini suliniutaavoq, angajoqqaajusut imigassamik ajornartorsiutillit katsorsarneqarlutillu sullinneqarnerannik aamma aqutsisuulluni.
Kommuneqarfik Sermersuumi allattoqarfimmi aamma pisortaanikuuvoq, Kalaallillu Røde Korsiata nuna tamakkerlugu siulersuisuini sulinikuulluni, Imigassarlu Ikiaroornartorlu pillugit siunnersuisoqatigiinni aamma siulittaasuunikuulluni.
