Politikki

Ilaqutariinnermut Naalakkersuisisoqarfiup pisortaata atorfini aamma qimappaa

Ilaqutariinnut Naalakkersuisoqarfimmi pisortaq Susie Marthin Kjeldsen illuatungeriit isumaqatigiissuteqarnerisigut februaarip naanerani atorfimminit tunuarpoq.

Allattoq Elisa Isaksen, Tikaajaat Kristensen

marsip 03-at 2015 11:04

Naalakkersuisut siulittaasuata Kim Kielsenip Inatsisartuni ilaasortap Agathe Fontainip paragraf 37 najoqqutaralugu apeqqutaanut akissummini tamanna uppernarsarpaa.

Aamma atuaruk Hardenberg naalakkersuisoqarfiup pisortaatut atorfimminit tunuartinneqarpoq

Naalakkersuisoqarfimmi pisortap atorfimmit tunuarneratigut taartaagallartussaq tassa naalakkersuisoqarfimmi pisortaagallartussanngortoq, maanna aamma peqqissutsimut Naalakkersuisoqarfimmi pisortaagallartutut inissisimareerpoq.

Tamannali Naalakkersuisunit ajornartorsiutissaqartinneqanngilaq.

- Naalakkersuisut isumaqarput, naalakkersuisoqarfinni marlunni taakkunani pisortaqartitsinermut ingerlaannaq aaqqiissutaasussatut toqqarneqartoq, naalakkersuisoqarfinni marlunni taakkunani suliassanik suliarinninnissamut toqqissisimanartuusoq, Kim Kielsen akissummini taama allaaserisaqarpoq.

Naalakkersuisut siulittaasuata ilanngullugu allaaseraa Ilaqutariinnermut aamma Peqqissutsimut naalakkersuisoqarfiit kattunnissaannut pilersaaruteqarani.

Naalakkersuisoqarfimmi pisortap soraarnerminut atatillugu qaammatini 18-ini aningaasarsiat, pensionisiat ilanngullugit, annertoqataannik aningaasanik tunineqassaaq. Sulinngiffeqarnissarlu suli atorsimanngisaa aamma nuunnermi soraarnermut atatillugu aningaasartuutaasinnaasut tassunga ilanngunneqassallutik.