Ilaqutariinnermut ataatsimiititaliaq Atammimmeeqqammivoq

Atammimmi innuttaasut ukiup 2000-p missaani kanngutsaatsuliornerpassuit qulaajarneqartut suli kingunerlutsippaat.
Atammik, februaarip 9. 2017 Assi © : Magssanguaq Qujaukitsoq
juunip 10-at 2017 16:20

Ataatsimiititaliap nunaqarfik taanna tikeraarusussimavaa pissutigalugu inatsisissatut siunnersuutit aalajangiiffigisassat arlallit isumaginninnermut tunngasut upernaakkut ataatsimiinnermi siunnersuutigineqarsimammata.

Assersuutigalugu inatsit meeqqanik ikiorsiinissamut tunngasoq. Taamaattumik ataatsimiititaliaq periarfissarsiorsimavoq innuttaasut ilaat inatsisissami pineqartut naapinnissaannut.

Ataatsimiititaliaq tusagassiuutinut taama nalunaaruteqarpoq.

AAMMA ATUARUK Kinguaassiuutitigut atornerluisoqarsimanera nunaqarfimmi suli kingunerlutsitsisoq

Maajimi ukioq 2000-mi paasineqarpoq, ujarassiooq Victor McGregor Atammimmi nukappiaqqanik ukiukitsunik  nerrivimmi arsaararnermi sungiusartakkani ukiut 30-t ingerlanneranni kinguaassiuutaasigut atornerluttarsimagai.

Victor Mcgregor tigusarineqarpoq tigummigallassanngortinneqartinneqarlunilu. Maniitsumi isertitsivimmiitilluni imminut toquppoq.

AAMMA ATUARUK McGregor suli kingunerlutsitsisoq

Nukappiaqqat atornerlunneqarsimasut maanna inersimasuupput ilaqutaqalersimallutillu. Atornerlunneqarsimasut ilaat atornerluisunngorsimapput inuunerminnilu ajornartorsiuteqarlutik.

Namminersorlutik Oqartussani nakkutilliisuutitat nalunaarusiaanni siorna aggustimi saqqummiunneqartumi tamanna inerniliunneqarpoq.

- Ataatsimiititaliap ilisimavaa inuuniarnikkut ajornartorsiutit atornerluinermillu ajornartorsiutit imminnut attuumassuteqartut, imaaliallaannarlu aaqqiissutissaqanngitsoq. Ungasissoq isigalugu ataavartumik pinaveersaartitsinikkut katsorsaasoqarneratigut aaqqiisoqartariaqartoq, ataatsimiititaliaq tusagassiuutinut allappoq.