Ilaqutaasut suli ujaasisut
- Neriuppugut aniguisimassasoq. Aniguinissaanut periarfissakikkaluaqisoq, qatanngutigigatsigu Hong Kongimut angerlaakkusupparput, maqaasineqartumut qatanngutaasoq, Stephen Cheung, oqarpoq.
Maqaasineqartoq 27-nik ukiulik Yat Wui Cheung Arctic Circle Trailikkoortilluni Eqalugaarniarfimmi julip ulluisa 14-ianni kingullermik takuneqarpoq. Ujaasinermi sapaatit akunneri marluk qaangiutereerput.
Aamma atuaruk Takornariaq suli ujaarineqartoq
Politiit, politiit qimmii, umiatsiat, namminnerlu kajumissutsiminnik ujaasisut ikiortigalugit takornariaq Sisimiut Kangerlussuullu akornanni ujaarineqaqattaarpoq. Qulimiguullimmi allaat ujarlernermi arlaleriarluni atorneqaraluarput, iluatsinngitsumilli.
- Malene Ingemannimik atillip ujaasinermi aaqqissuillunilu nutserissuttarpaatigut. Inuit piumassutsiminnik ikiuuttut qulit sinnerlugit pisullutik ujaaseqataareerput, Stephen Cheung oqarpoq.
Politiilli neriuutaarutilereeraluartut qatanngutaasut inuttaa timaaluunniit nassaaritinnagu nunagisaminnut uterallarnianngillat.
Aamma atuaruk Takornariaq ujarneqartoq
Stephen Cheung najanilu maanna Sisimiuniittut Kangerlussuarmukalerput.
Qatanngutigiit Kangerlussuup Sisimiullu akornanni ujaasillutik ulluni pingasuni pisoqatissarsiorput.
- Qatanngutigalu kisitta ujaaseqqusaanngilagut kuuit ulorianarmata. Angajoqqaatta ernumagaluta aamma kisimeeqqunngilaatigut.
Takornariamut maqaasineqartumut Kangerlussuup Sisimiullu akornanni piumassutsimik ujaaseqataarusuttut Malene Ingemannimut saaffiginnissinnaapput, oqarasuaammut uunga sianerlutik: 52 66 68.