Ilaasussarpassuit ingerlariaqqinnaveeqqasut

Ilaasussat 300-t sumiiffinni assigiinngitsuni ingerlariaqqinnaveeqqapput. Ilaasussallu aqagu sapinngisamik apuunneqarnissaat Air Greenlandimit pilersaarutigineqarpoq.
Assi © : KNR
Allattoq Jonas Fievé
marsip 21-at 2017 18:45
Nutserisoq Bikki P. Kleist

Anorersuarnera pissutigalugu silaannakkut angallanneq eqqugaaqqavoq. Ilaasussat illoqarfinni assigiinngitsuneersut Kangerlussuarmiittullu katillugit 300-t ingerlariaqqinnaveeqqapput. 

AAMMA ATUARUK Timmisartuussinissarpassuit silarlunnera pissutigalugu taamaatiinnarneqartut

Ilaasussani 110-t Københavniliartussaagaluarput, taakkualu amerlaqatai Kangerlussuarmi maanna saperngullutik.

Ilaasussat ingerlaqqittussat  sapinngisamik apuuffissaannut aqagu timmisartuunniarneqassasut, Air Greenlandip ilisimatitsissutigaa.

- Qallunaat timmisartortitseqatigiiffiata timmisartuutaa Jettime attartoriarlugu Københavnimit Kangerlussuarmukatinneqassaaq. Aammattaaq nunatta iluani timmisartuussinissanut angalasussat aqagu apuunniarneqarput, Air Greenlandimi, timmisartuussinissat pillugit ataqatigiissaarisartoq, Niels Chemnitz Frederiksen KNR-mut oqarpoq.

- Silali aqagu angalanissamut akornuseerartarsinnaavoq, sila suli allanngoraqattaarpoq, Niels Chemnitz Frederiksen oqarpoq.

- Silali angallaviusinnaalerpat Nuummut timmisartuussisoqarsinnaassaaq, ualiartorneranili nittaallertassangatinneqarmat tamanna akornusersuerartarsinnaavoq, Niels Chemnitz Frederiksen KNR-mut oqarpoq.

AAMMA ATUARUK Qinersisartunik ataatsimiititsinissat KNR-ip kinguartittariaqalerai