Ikummatissat pillugit isornartorsiuineq akerlilerpaat
Isumaqatigiissuteqarnissap oqaluuserineqarnerani Unammilleqatigiinnissamut Nakkutilliisoqarfik Namminersorlutik Oqartussanut piumasaqaateqarsimavoq uuliamik tuniniaanermi akit assigiittussannerannik aalajangersagaqarneq "maksimalpris"-inik taarserneqassasoq, tassa akit qaffasinnerpaaffilerneqassasut.
Tamannali SIK-mit eqqarsarnartoqartinneqarpoq, ikummatissanut akit nunaqarfinni atuuttut illoqarfinnut naleqqiullugu qaffasippallaalernissaat ernummatigineqarmat.
Akit assigiittussaanerannik aalajangersakkamik aappaagu januaarip aallaqqaataani atorunnaarsitsisoqarpat ikummatissanut imerpalasunut akit ullumimut naleqqiullugit qaffasinnerulernavianngitsut, Unammilleqatigiinnissamut Nakkutilliisoqarfiup siulittaasuata Carl-Aage Skovaap erseqqissaatigaa.
Uuliaarniat ataasiakkaat akit qaffasinnerpaaffissaaninngarnit appasinnerusumik tamatuma malitsigisaanik akeqartitsisinnaalissapput. Atuisunullu tamanna iluaqutaaginnarumaartoq, Unammilleqatigiinnissamut Nakkutilliisoqarfiup oqaatigaa, akit unammilleqatigiinnermi sapinngisamik appasitsinneqartarmata.
Sinerissap ilaani unammilleqatigiittoqanngitsoq, Unammilleqatigiinnissamut Nakkutilliisoqarfiup ilisimagaa, Carl-Aage Skovaa oqarpoq, kiffartuussinissamullu nutaamik isumaqatigiissuteqarnikkut tamani tamaani unammillertoqalerumaarnissaa neriuutigigitsik, Carl-Aage Skovaap oqaatigaa.
