Meeqqat assammik arsartartut amerlisarneqassasut
Piffiit ilaanni meeqqat inuusuttullu assammik arsarnermik soqutiginninnerat annikilliartornikuuvoq. Tamannali Assamik Arsartartut Kattuffianni, GHF-imi, siulittaasup, Jørgen Olsenip illuanut saatsinniarpaa.
Timersoqatigiiffinni kajumissutsimik sulisut peqatigiiffilerinermi pikkorissartinneqassapput, taamaaliornikkut timersoqatigiiffiit iluini suliatik pikkoriffiginerulissavaat. Sungiusaasuttaaq pikkorissarnissamut periarfissaginnerulissapput. GHF-imi siulittaasoq taama oqarpoq. Suliniutit taakku siulersuisut siuliisa aallartitaraat.
- Taamaaliornikkut sungiusaasut, arlalitsigut aamma timersoqatigiiffimmi peqatigiiffilerisuusartut, assammik arsarnerup meeqqanut inuusuttunullu soqutiginarnerulersinnissaa qulakkeersinnaalissavaat, minnerunngitsumillu timersoqatigiiffinni susassaqartitsinermik pikkoriffeqarnerulissallutik, Jørgen Olsen KNR-imut oqarpoq.
Suliniutissalli taakku piviusunngussappata GHF-imi siulersuisut aningaasanik nassaarnissamik suliassaqarput.
Taamaammat GHF-ip Kalaallit Nunaanni Timersoqatigiit Kattuffiat eqqartueqatigissavaa. Kattuffiit taakku suleqatigiillutik GHF-ip aningaasalerneqarnissaa kiisalu ineriartortitseqatigiiffiusinnaasut misissorneqassapput.
Kajumissutsiminnik sulisut ajunngitsorsisassasut
GHF naapertorlugu inuit ikittuinnaat sungiusaasarlutillu peqatigiiffilerisarput. Taamaammat kajumissutsiminnik sulisut ikittut nammineq suliffimmi saniatigut akunnerpassuit nukippassuillu assammik arsarnermut atortarpaat. Kajumissutsiminnik sulisut piginnaasaasa attatiinnarnissaat pillugu taakku aningaasanik tunisiffigineqartalersinnaaneranut periarfissat GHF-ip siulittaasuata oqallisigerusuppaa.
- Ilaasortat suliaminnut akissarsitinneqartarnissartik kissaatigisimavaat. Taamaammat kattuffiup taakku qanoq suliniuteqarfigineqarsinnaanerai siulersuisut eqqartorniaraat, Jørgen Olsen oqarpoq.
Jørgen Olsen aamma isumaqarpoq klubbit isiginnittaasaasa suleriaasaasalu pitsanngorsarneratigut Nuummi holdi GSS angutitaasa arnartaasalu nunatsinni assammik arsarnermi angusagissaarluartartut unammillerneqarsinnaalissapput.
Pan Am atorluarneqassaaq
Pan Am-imi unammersuarnerit Nuummi aasaq 2018-imi ingerlanneqartussaassagunarput. Jørgen Isak Olsenilu naapertorlugu aaqqissuussinerit assammik arsartarnermik meeqqat inuusuttullu soqutiginninnerulersinneqassapput. Assammillu arsarnerup silarsuaata periarfissaq tamanna nutaanik ilaasortassarsiornermut atorluarluarsinnaavaa.
- Siulersuisut Pan Am-ertoqareernerani assammik arsartartunik nutaanik qanoq tigusilluarsinnaanissaminnut iliuusissamik qinersissapput, GHF-ip siulittaasua oqarpoq.
AAMMA ATUARUK Assammik Arsartartut Kattuffiat nutaamik siulittaasoqalersoq