Issittumi sakkutooqarfik: Qaqqap sisoornera tassaarsuaqartitsisoq
Tassaarsuarmut arfininngormat Nuugaatsiami qarsutsitsisumut sunarpiaq pissutaanersoq ippassaq sapaammi erseqqissumik suli oqaatigineqarsinnaanngilaq.
Issittumili Sakkutooqarfiup ajunaarnersuarmut pissutaasoq nassaarisimarpasippaa:
- Arfininngormat unnukkut kangerlummi Karrani qaqqap sisoorneratigut nuna sajuppillappoq. Nuna 300 x 100 meterit missaannik angitigisoq kangerlummut sisoorpoq tassaarsuaqartitsillunilu, tassaarsuarlu kingorna qeqertanut kangerlunnut eqqaaniittunut annguppoq, Issittumi Sakkutooqarfik facebookimi quppernermini ataasinngormat ullaakkut taama allappoq.
GEUS: Paasissutissat paasiuminaatsupilussuupput
Issittumi Sakkutooqarfik Facebookimi quppernerminut assitaliussaani qaqqap ilarujussua sisoorsimasoq takuneqarsinnaavoq.
GEUS naapertorlugu qaqqap sisoorneranut nunap sajunnera pissutaanersoq maanna oqaatigineqarsinnaanngikkallarpoq. Qaqqalli sisoornera, arfininngormat nal. 21.40 uuttortarneqartoq immini sajuppillatsitsisimasinnaasoq oqaatigineqarpoq.
- Paasissutissaativut paasiuminaatsupilussuupput, aamma nunap sajunnera pissutigalugu qaqqaq sisoorsimanersoq, imaluunniit qaqqaq immini sisoorsimanersoq takusinnaanngilarput. Paasissutissaatitsinni tamanna immikkoortissinnaanngilarput, GEUS-imi ilisimatuut pisortaat seismologi, Tine Larsen, taama oqaluttuarpoq.
Nal. 21.40 sajuppillattoqarneranit minutsit arfineq-pingasut qaangiummata Nuugaatsiaq tassaarsuarmit eqqugaavoq, illut aqqanillit amuneqarput inuillu sisamat maannamut maqaasineqarlutik.
