Novo Fond sukkorneq pillugu sullissiviliornissamut millionerpassuarnik aningaasaliiniartoq
Peqqinnissaqarfik, Naalakkersuisut Danmarkimilu aningaasaateqarfik Novo Nordisk Fonden anguniagassatut takorluukkamik isumaqatigiissuteqarput. Ilaatigut sukkornermik nappaateqartunik katsorsaaviusussamik sukkornermillu ilisimatusarfiusussamik Steno Diabetes Center Grønlandimik taallugu sukkorneq pillugu Nuummi sullissiviliornissaq anguniagaavoq.
AAMMA ATUARUK Aningaasaateqarfik sukkorneq pillugu Nuummi sullissiviliorusuttoq
Danmarkimi nakorsaasiorfissuup Novo Nordiskip sukkornermik nappaatilinnut insuliniliorfiusup aningaasaateqarfia sullissiviliornissamik anguniakkamillu sulissuteqarnermut aallarniisuusoq, Novo Nordisk Fondenimi Stenomik suliniutini suliniuteqarnermut pisortap, Jannik Hilstedip, oqaatigaa.
- Novo Nordisk Fondenip aalajangersagai naapertorlugit aningaasaateqarfiup aningaasaatai Danmarkimi sukkornermik nappaateqartut katsorsarneqarnerinut atorneqassapput. Tassungalu tunngatillugu Kalaallit Nunaat Danmarkip ilagaa, taamaattumillu aalajangerpugut Kalaallit Nunaat suleqatigiinnissaq siunertaralugu saaffiginiarlugu.
Nunatsinni peqqissaanermik suliallit pikkorissartinneqassapput
Nuummi Dronning Ingridiup Napparsimmavissuani Inuunerissaaveqareerpoq. Sukkornerlu pillugu sullissiveqalerneratigut nunarput tamakkerlugu peqqissaanermik suliallit inooriaatsimik patsiseqartumik nappaatit, soorlu sukkorneq, uummatikkut taqqatigullu nappaatit pualluullu KOL pillugit pikkorissartinnissaat pisinnaanngussaaq.
- Sulisut pikkorereeqisut ilinniartinnerisigut, pikkorissartinneqarnerisa pitsaanerulersinneratigut pisariaqartinneqartunillu pisiortornikkut tamanna pissaaq, Jannik Hilsted oqarpoq.
Tamannalu Peqqissutsimut Pitsaaliuinermullu Aqutsisoqarfimmi pisortap, Malene Marie Nielsenip, nuannaarutigaa.
- Tamanna Kalaallit Nunaannut pingaaruteqartupilussuuvoq, inooriatsimimmi patsiseqartumik nappaatillit sukkornermillu nappaatillit amerliartuinnarput. Sapinngisamik amerlanerpaanut, aamma nunaqarfinni, suliniutigerusutavut tapersersornissaannut Novo Fonden periarfissaqarpoq aammalu pitsanngorsaaqataasinnaalluni.
AAMMA ATUARUK Sukkorneq glutenitalinnik nerisaqarnermik pissuteqarsinnaavoq
Namminersorlutik Oqartussat aningaasartuutigisartagaat allanngussanngillat
Sanaartugassap annertussusissaa, sullissiviup ingerlanneqarnissaa tamatumunngalu aningaasartuutissat aningaasaateqarfiup Naalakkersuisullu aatsaat 2020-mi isumaqatigiissutigisussaavaat. Sanaartornerli ingerlatsinerlu 'millionit marlunnik kisitsisitallit iluaniitinniarnissaat ajornakusuussasoq', Jannik Hilstedip oqaatigaa.
Namminersorlutilli Oqartussat sullissivimmik piginnittuunissaat, inooriaatsimillu patsiseqartumik nappaatit pitsaaliornissaannut katsorsarneqarnissaannullu aningaasartuutigineqartartut ullumikkumit amerlanerussanngitsut isumaqatigiissutigineqareerpoq. Aningaasartuutit sinneri Novo Nordisk Fondenimit akilerneqassapput.
Misissuinerup takutippaa kalaallit quliugaangata ataaseq pallillugu sukkornermik type 2-mik nappaateqartoq, tallimaagaangatalu ataaseq sukkornermik type 2-mik nappaateqalersinnaanermut ersiuteqartartoq, amerliartuinnartullu.
AAMMA ATUARUK Taamaammat 15 kiilunik oqimaappallaarputit
- Sukkorneq ukiut 30-40-t matuma siorna Kalaallit Nunaanni atugaanngilaq. Inersimasut akornanni type 2-mik nappaateqartut ullumikkut 10 procentiupput. Ikiliartunngillat, amerliartorlutilli, Jannik Hilsted oqarpoq.
Novo Nordisk Fonden aamma Danmarkimi nunap immikkoortuini tallimaasuni sukkorneq pillugu sullissivinnik pilersitsisuuvoq.