MIO: Meeqqat Facebookkimi atornelunneqatsaaliortigit

Assinik ikkussuinerup kingunerisinnaasai facebookimi atuisut amerlasuut eqqumaffiginngitsoortarpaat, assimmi, ilaatigut meeqqat assingi, atornerlunneqarsinnaapput, Meeqqat Pisinnaatitaaffiinik Sullissivik, MIO, mianersoqqusivoq.

Allattoq Sara K. Jakobsen

apriilip 05-at 2016 14:51

Facebook nunatsinni atugaaqaaq, asserpassuarnillu ikkussuiffigineqartarluni.

- Meeqqat atisaqanngitsut facebookikkut ikkukkaangatsigit, ajortumik eqqarsanngikkaluarlutaluunnit inequgalugit qanigisatsinnut takutinniarlutigit, ajoraluartumik nunarsuarmi inoqarpoq assinik taamaattunik atornerluisinnaasunik, Meeqqat Illersuisuat Aviâja Egede Lynge oqarpoq.

Meeqqat kinguaassiutitigut kanngutsaatsuliorfigineqarsimasoralugit nunatsinni politiit misissuigaangata meeqqat assingi toqqortarineqartut siumortarpaat.

- Misissuinitta nalaani nassaartarpugut meeqqat assingi anillatseriarlugit assiutigineqartut qarasaasiamilu harddiskiniluunniit toqqortarineqartut, politiit pisortaata tullersortaa Viggo Johansen oqarpoq.

Aamma atuaruk Aviâja Egede Lynge: Ajornartorsiut aaqqiivigiineqartariaqarpoq

Meeqqat ilaasa angajoqqaamik assit saqqummiussat killilersinnaaneq ajorpaat, angajoqqaallu eqqarsaqqeqqaartassasut Meeqqat Illersuisuata oqaatigaa. Nittartakkamimi assit filmiliallu isornaassinnaagaluilluunniit kaaviaaleraangata utertikkuminaassisarput.

Facebookip malittarisassai naapertorlugit meeqqat 13-ileereeraangata facebookeqalersinnaapput. Inuusuttullu taakku namminneq assiminnik siammarterinnginneranni angajoqqaaminnit ilitsersuunneqaqqaartassasut meeqqat illersuisuata kaammattuutigaa.

- Pingaaruteqartorujussuuvoq inersimasut inuusuttortaminnut arlaatigut aqqutissiuinissaat assinik ikkussinnginneranni ilitsersuullugit.