Ikkattip salinniarneqarnera nuannaarutigigaa
Sakkutooqarfiusimasut ungasinngisaani najugaqartut saliisoqartussanngornera nuannaarutigaat.
Sakkutooqarfiusimasoq, Kuummiut Sermiligaallu akornanniittoq, Ikkattermiittoq mittarfittut 1940-kkunni sananeqartoq, salinneqartarialinni pingaarnertut taaneqarpoq.
Nappartat qimaannakkat
Tassanimi nappartarpassuit allallu amerikamiunit sorsunnersuup aappaata nalaani atorneqareerlutik qimaanarneqarsimapput.
- Nappartarpassuit taakani mingutsitsipput, ingammik savimerngit. Illukut biilikullu taakaniittut nunami alianaatsumi ajoraluartumik mingutitsipput, Kuummiuni Sermiligaamilu nunaqarfimmi aqutsisoq, Peter Nathanielsen, oqarpoq.
AAMMA ATUARUK Danmarkip akisussaaffimmik tigusinera nuannaarutigaara
AAMMA ATUARUK 150 millionit koruunit naammannavianngillat
Nappartarpassuillumi, savimerngit allallu Ikkattermi sumi tamaani takussaapput. Ikkatteq Kuumiuniit Sermiligaamut angallammik aqqutaaniippoq, mittarfiusimasullu eqqaa aasami eqalunniarfiusarluni.
Taamaammallu nutaarsiassani ippassaq tusagaq nunaqqataasunit nuannaarutigineqarpoq.
Pinngortitap alianaallinissaa qilanaaraat
- Saleqqissaarneqarpat nuna pissusissamisut alianaalleqqissasoq neriuutigaara. Kikkulluunniit aamma taakunga ukiassaraangat aamma Sermiligaarmiut Kuummiormiullu nuniagiartarput, Peter Nathanielsen oqarpoq.
Amerikamiut sakkutooqarfigisimasaat salinneqassasut, siunniussat pillugit nalunaarummi, Naalakkersuisut siulittaasuannit pingasunngornermi atsiorneqartumi, allassimavoq
Sorliilli salinneqassanersut allassimanngilaq, immikkoortumili siullermi atuarneqarsinnaavoq sakkutooqarfiusimasut isumaqatigiissuteqarfigineqariinngitsullu salinneqassasut.
Assersuutigalugu Kangerlussuaq Nunatsinnut Danmarkimullu isumaqatigiissuteqarnikkut tunniunneqareerpoq taamaammallu siunniussat pillugit nalunaarummi ilaanngilaq.