Ikiup isornartorsiutaa Kommuneqarfik Sermersuup ilumoornerarpaa

Kommuunini innuttaasut ikiorneqarnissamik pisariaqartitsisut naammattumik ikiorneqarneq ajornerarlugit Ikiup isornartorsiuinera, Kommuneqarfik Sermersuumi isumaginninnermut ingerlatsivimmi pisortap Grethe Nielsenip ilaatigut isumaqatigaa.

Naammagittaalliornissamut amingartumik aqqutissiuussisarnerat pillugu, Ikiu-p kommuunit isornartorsiorpai.

Aalajangiisoqarsimatillugu sullitat naammagittaalliornissamut innersuunneqartuarnissaat, kommuunit sulisuminnut erseqqissartartussaagaat, Grethe Nielsen oqarpoq sulisulli pitsanngoriaqqissinnaasut erseqqissarlugu.

- Aaqqiinissatsinnut iliuuseleruttorpugut. Aammali imaassinnaavoq pitsannerusumik erseqqissaalluarnerusinnaasugut, pisortaq oqarpoq, neriorsuillunilu tamanna eqqumaffigiuassallugu.

Aamma atuaruk Ikiu: Kommunit innuttaasut sanngiinnerit sumiginnaraat

Ikiu-p aamma kommuunini sullissisut sullitaminnut siunnersuinngippallaarnerarlugit isornartorsiorpai.

Aammali naammatumik aqqutissiuinissaq ajornakusoorsinnaasartoq, Grethe Nielsenip nassuerutigaa, tamatumanilu sullissisussanik amingaateqarneq peqqutaasoq oqaatigalugu.

- Kommunini ulappunneq peqqutaalluni naammattumik aqqutissiuinissaq ajornakusoorsinnasarpoq.

Itisiliivorlu:

- Piffiit ilaatigut ilinniarsimasunik naammattunik sullissisussarsisinnaasannginnerput uani peqqutaasarunarpoq. Taamaaligaangallu sullissisut ataasiakkaat piffissakilliorlutik

sullitamik siunnersorneqarluarnissamik kissaataat naammassisinnaasanngilaat, gn oqarpoq.

Aamma komuunini sullissisut isumaginninnermut tunngasuni kukkuluttorpallaartartutut, Ikiu-p maluginiarpai.

Grethe Nielsenilli Ikiu isornartorsiumminik itisileeqqua.

- Sunarpiaq pineqarnersoq nalullugu aaqqiinissaq ajornakusoorpoq. Isornartorsiummili suna pineqarnersoq tusarusupparput,Grethe Nielsen oqarpoq.

Sullissisulli pikkorissartuarnarnissaannik Iikiup kaammattuutaanut Kommuneqarfik Sermersooq isumaqataavoq.

- Sulisut pikkorissarneqartuassasut aammalu pikkorissarnissaminnut periarfissinneqarnisaat pingaaruteqartoq isumaqarpugut,

Kommuneqarfik Sermersuumi Isumaginninnermut, Suliffeqarnermut Inuussutissarsiornermullu Ingerlatsivimmi pisortaq Grethe Nielsen oqarpoq.