Ikinnerussuteqartut sunniuteqarnerunermik kinguneqassaaq
Danmarkimi ikinnerussuteqarlutik naalakkersuisuutitaqartoqalerpoq, tamannalu nunatsinnut tunngatillugu tusarluarnarpoq. Nunatsinniit Folketingimi ilaasortaatitat marluk taama isumaqarput.
- Isumaqarpunga akuersaarnartuusoq naalakkersuisut siammasissumik suleqateqarnissamik ujartuilersussaanerat, taamaattumik suliani assigiinngitsuni malunnaateqarnissatsinnut periarfissaqarlualerpugut, ingasammik nunatsinnut nunattalu soqutigisaanut sulianut tunngasunut.
Inuit Ataqatigiinniit Folketingimut ilaasortaq Aaja Chemnitz Larsen KNR-mut taama oqarpoq.
Isumaq Siumumeersup Aleqa Hammondip aamma isumaqataaffigisaa.
Siammasissumik suleqatigiissapput
Taannami isumaqarpoq, Venstremiit aqunneqartumit naalakkersuisuutitaqalernerup kingunerigaa, Folketingimi siunnersuutit tapersersorneqassappata siammasissumik suleqatigiittoqarnissaa. Tamassumalu sunniuteqarnerunissamut periarfissiissoq, Aleqa Hammond isumaqarpoq.
Aamma atuaruk Naalakkersuisut nutaat aajukua
Aaja Chemnitz Larsenillu erseqqissarpaa saamerliit suleqataaffigileraluarlugit, suliani ataatsimut suleqatigiissutaasinnaasuni Løkke suleqatiginissaanut piareersimaffigalugu.
- Immitsinnut killilersorata inissippugut, tamannalu Lars Løkkemut arlaleriarluta naqissuserparput. Toqqaannartumimmi danskit partiivisa arlaat suleqatiginngilarput, taamaattumik atlantikup avannaaneersunit ilaasortaasunit sinneranit killilersugaannginnerusumik inissisimalerluta.