15-inik ukiullip Philipip arnaa: Ikiaroortarunnaassaanga

15-inik ukiullip Philip Knudsenip rapperluni angajoqqaaminut tusaaqqulluni sapaatip akunnerata siuliani musikvideoliaminik saqqummersitsivoq. Anaanasumullu tamanna eqiiallassutaasimavoq.
Philipip nukaa (s) arnaa Thala Knudsen Philip Knudsenilu. Assi © : KNR/Johansinnguaq Olsen
aggustip 15-at 2017 11:54

Philip Knudsenip aanngajaarniutit akornaniinnini qatsullugu taalliorpoq:

- Soqutiginanga pisarpusi ikiaroorlusi, ikiaruujutigalusi imiinnartusi, 15-inik ukiulik Philip Knudsen rapperpoq.

Ernerup tusaaqqunera anaanaasumut attuisimaqisoq KNR-ip najugaanut Nuummiittumut pulaarmagu oqarpoq.

- Killitsinnaqaaq. Assut eqqarsarnartorujussuuvoq anaanaalluni, Thala Knudsen oqarpoq.

Philip Knudsenip taama saqqummernermini angajoqqaaminit tusarneqarnissani siunertaralugu sapaatip akunnerata siuliani saqqummersitsinerminut atatillugu KNR-imut oqarpoq.

- Ikiaroortarunnaassasut neriuutigisinnaava taanna. Nuannarinnginnakku kisimiittarlunga, immikkoortinneqartarlunga ikiaroornartut saninniiginnaavittut, Philip Knudsen oqarpoq.

AAMMA ATUARUK Rappertalerlaajaqqap saqqummeeqqaataa aalassatsitsisoq

Ikiaroortarnini nassuerutigaa

Thala Knudsenip meeqqani pingasut, tassa Philip Knudsen nukaa angajualu kisimiilluni najugaqatigai.

Atortitanilu Philipip rappernermini saqqumiussai ilisarisinnaalluarpai.

- Ikiaroornartoq, cigaretsit imigassarlu soorunami sulinngiffinni atorsinnaasarakkit. Eqqarsarnartorujussuugamik Philipip oqaasii, soorunami anaanaalluni kanngunaraluarluni pikkoreqaaq, Thala Knudsen oqarpoq.

Anaanaalluarnerulernissanilu neriorsuutigaa.

- Unittariaqarpunga. Ilami ukiorparpassuit (hash aaqq.) pujortartarnikuungama. Ukioq manna neriorsornikuugaluarpakka uninniarsarissallunga. Ilaanni pujortartarluni sapernarami.

AAMMA ATUARUK Ikiaroorunnaarniaritsi

Anaanaasullu ernermi oqariartuutaa imminerminuinnaanngitsoq, allanulli aamma sunniisinnaassasoq neriuutigaa.

 - Neriuppunga eqeertitsisinnaassasoq eqqarsartitsilluni "unittariaqarpunga meeqqakka pillugit.". Thala Knudsen oqarpoq.

Philip Knudsen ”Inuunera naluara”-mik saqqummersitsisoq nuuteeqqamik kingusinnerusukkut saqqummersitsissaaq.

Inuunera Naluara