Kalaallit Nunaanni Timersoqatigiit Kattuffiata timersornikkut aaqqissuussat tamaasa atorunnaarallarteqqugai
Silami illullu iluani timersornikkut aaqqissuussat tamaasa atorunnaarallartinneqarnissaat, Kalaallit Nunaanni Timersoqatigiit Kattuffiata tusagassiutinut nalunaarummi innersuussutigaa.
Timersornikkut aaqqissuussat tamaasa, timersoqatigiinnilu tamani aaqqissuussat tamaasa marsip ulluisa 31-ata tungaanut taamaatiinnarallarneqarnissaat, Kalaallit Nunaanni Timersoqatigiit Kattuffiata kaammattuutigaa.
AAMMA ATUARUK Coronamut aarlerineq: Avannaata Qimussersuaaraa taamaatinneqartoq
- Timersornermi aaqqissuussat inuppassuarnik; timersortartunik isiginnaartunillu ataatsimoortitsilluni katersuuffiusarput. Taamatullu ataatsimoortitsineq coronavirusimik tunillatsinnissamut tunillaassuinissamullu kinguneqarnissaa qanittuararsuanngorsinnaavoq, Kalaallit Nunaanni Timersoqatigiit Kattuffianni siulittaasoq Nuka Kleemann oqarpoq.
Futsalimik, qimussimik, sisoraatinillu unammiuaarnissat eqaarsaarnissallu taamaatinneqartut
Nunani allani timersoqatigiit kattuffiisa pissartanngorniunnissat sungiusarnerillu oqartussat innersuussutaat malillugit aamma taamaatiinnareerpaat.
Kalaallit Arsaattartut Kattuffiata, KAK-p, futsalimik marsimi, apriilimi maajimilu unammiuaarnissat aamma taamaatiinnarpai. Tassa nukappiaqqat inuusuttut U15-it, nukappiaqqat U18-it pissartanngorniunnissaat, arnat angutillu pissartanngorniunnissaat kiisalu angutit utoqqasaat pissartanngorniunnissaat taamaatiinnarneqarput.
AAMMA ATUARUK Innersuussutit nutaat: Nunatsinnit nunatsinnullu angalasoqarnaveersaartoqarli
Niviarsiaqqat U18-it pissartanngorniunniussaat, ullumi tallimanngornermi aallartittussaq, isiginnaartoqaratik pissartanngorniutissapput.
Avannaata Qimussersuaaraa, Uummannami qaammatip naalernerani pisussatut aaqqissuunneqaraluartoq, aamma taamaatiinnarneqarpoq. Arctic Sportsimi pissartanngorniunnissaq, Arctic Circle Race aamma taamaatiinnarneqarput, soorlu aamma Nuummi eqaarsaarnerit taamaatiinnarneqartut.
