Pikialasorsuaq pillugu ICC-p isumalioqatigiissitaliai aallartilluarput
Pikialasorsuaq pillugu isumalioqatigiissitat Inuit Issittormiut Siunnersuisoqatigiiffiannit ICC-mit pilersinneqarput, Nunavummi Nunatsinnilu innuttaasut Pikialasorsuarmut qanittumi najugallit oqaloqatigineqarnissaat siunertaalluni.
Pikialasorsuaq tassaavoq imartaq Qaanaap Umimmaallu Nunaata akornanniittoq. Imartaq tamanna qaasuitsup killeqarfiata avannaani pinngortitami ataqatigiinnermi uumasunik pinngorarnerpaaffiuvoq. Silap pissusiata allanngoriartornerata kingunerisaanik sunnertiasuuvoq, umiarsuillu tamaani angallannerulerpata aamma eqqorneqarnerlussinnaalluni.
- Nunaqarfinnit peqataasut ilarpassuisa tusarniaanerup piffissami matumanerpiaq ingerlanneqarnera assut qujamasuutigaat, Pikialasorsuup atorneqarnera avataaniillu soqutigineqarnera malunnaatilimmik annertusiartorsimammat, Kuupik V. Kleist, Kalaallit Nunaat sinnerlugu ilaasortaq tusagassiuutinut nalunaarummi taama ilaatigut oqarpoq.
Aamma atuaruk Issittumi takornariartaatileriniarneq apeqquserneqartoq
Pikialasorsuaq pillugu isumalioqatigiissitat Kalaallit Nunaanni nunaqarfinnut Pikialasorsuup qanittuaniittunut aggustimi angalassapput, tusarniaanerit tassani nanginneqassallutik.
Isumalioqatigiissitami ilaasortat tassaapput Okalik Eegeesiak, nunat tamalaat kommissærisoq ICC-llu nunani tamalaani siulittaasuusoq, aamma Eva Aariak, Nunavummi naalakkersuisunut siulittaasuusimasoq, Canada sinnerlugu kommissæritut maanna issiasoq, taavalu naalakkersuisut siulittaasorisimasaat Kuupik V. Kleist, Kalaallit Nunaat sinnerlugu kommissæriusoq.
