ICC uran pillugu: Innuttaasut tusarneqarnatik suli misigipput

Kuannersuarni aatsitassarsiortoqarniarneranut atatillugu innuttaasut, suliniaqatigiiffiit, suliffeqarfiit, Kommune Kujallermilu attuumassuteqartut allat, naammattumik paasissutissinneqarsimasutut

peqataatinneqartutullu misigisimanersut nalunaarusiortut misissorpaat.

Paasissutissat innuttaasut amigaatigaat

Peqataatinneqanngitsutullu misigisimasut, nalunaarusiami inerniliunneqarpoq.

- Pingaarnertut inerniliussarput tassaavoq, paasissutissat tunngaviusumik kujataani innuttaasut amigaatigigaat, nalunaarusioqataasoq inuiaqatigiilerinermilu bacheloritut ilinniagaqartoq, Mia Olsen Siegstad oqarpoq.

Nalunaarusiaq naapertorlugu, Kuannersuarni uranimik piiaasoqarnissaanik illersuisut akerliusullu paasissutissanik amerlanernik paasiuminarnerusunillu ujartuipput, aalajangernissamullu peqataatinneqarusullutik.

Aatsitassarsiornermi avatangiisinut nunalerinermullu kingunerisinnaasat ilaatigut ernummatigineqarput. Paasissutissallu tamanit atuarneqarsinnaasut paasiuminaattartut oqaatigineqarpoq.

- Aamma kisitsiserpassuit atorneqartaramik ulluinnarni aatsitassarsiornermi suliaqartut atortagaat, Mia Olsen Siegstad oqarpoq.

Paasissutissat paasiuminaattut

Paasissutissallu kalaallisut nutserneqarsimappata paasiuminaattartut aamma erseqqissaatigineqarpoq.

Aamma Narsami Qaqortumilu innuttaasut, politikerit, suliffeqarfiit, suliniaqatigiiffiillu apeqqutinut arlaqartunut akissutissarsinissartik amigaatigaat.

Ilaatigut Kuannersuarni aatsitassarsiorneq aallartissappat, sulisussat nunanit allaneersut qanoq amerlatigissanersut peqqissaasumit paasiumaneqartoq, nalunaarusiortup aappaata, naggueqatigiit Inuit pillugit ilisimatuup, eskimologip, aamma ICC-p Nunatsinni immikkoortortaqarfiani pisortap, Mads Fægteborgip oqaatigaa.

- Nunanit allaneersorpassuit tikinnissaat takuusinnaammassuk, ernumasorujussuupput, Mads Fægteborg oqarpoq.

Canadami misilittakkat tikkuussisuusinnaapput

Canadami misilittakkat tikkuussisuusinnaasut Kommune Kujallermi innuttaasunit oqaatigineqartarsimasoq, Fægteborg oqarpoq.

Canadami innuttaasut suliassanut aatsitassanut tunngasunut ingerlatsinissamut aatsitassallu qanoq atorneqarnissaannut peqataatinneqarnerujussuusut taassuma aamma oqaatigaa.

Nunatsinnilu aatsitassat suut pigineqarnersut, qanoq illersorneqassanersut, inuiaqatigiinnullu iluaqutaanissaannut qanoq qulakkeerinissamik nassuiaasiortoqartariaqartoq, nalunaarusiami allaqqavoq.

Nunavummi Kiggavimmi uranisiortoqarnissaanut suliffeqarfiup uranisiorniartup aamma sumiiffimmi aalisartut, piniartut, suliffeqarfiit, ilinniarfiillu attaveqaqatigiiffissaannik pilersitsisoqartoq, assingusumillu Nunatsinni pilersitsisoqartariaqaraluartoq, Mads Fægteborgip oqaatigaa.

Canadamilu innuttaasut peqataatinneqarnissaat pisortaninngaanniit sulissutigineqarnerusartoq, eskimologip oqaatigaa.

- Canadami tusarniaanermut piffissaliussaq sivisunerujussuuvoq, allaanermillu ingerlariaaseqarlutik, Mads Fægteborg oqarpoq.

Nalunaarusiornermut Naalakkersuisut siulittaasuata naalakkersuisoqarfia 250.000 koruuninik aningaasaliivoq.