ICC-p Pikialasorsuaq pillugu Isumalioqatigiissitaa nalunaarusiamik saqqummersitsisoq
Pikialasorsuaq (Avannaani Imarnersaq) Smith Sundip Nunattalu avannaarsuata Canadallu akornanni imartaavoq.
Pikialasorsuaq Issittumi imarnersat annersaraat Issittullu immikkoortuini uumassusillit pinngorarfiisa annersaannut ilaalluni.
Pikialasorsuaq pillugu nalunaarusiaq, imarnersaq pineqartoq pillugu Københavnimi sapaatit akunnerata siuliani ataatsimeersuarnermi ilisimatuunit Nunatsinneersunit Danmarkimeersunit Canadameersunillu peqataaffigineqartumi saqqummersinneqarpoq.
Nalunaarusiaq pingaarnernik pingasunik inassuteqaatitaqarpoq, Pikialasorsuup qanigisaaniittut inoqarfiit Canadamiittut Nunatsinniittullu tusarniaaffigereerlugit suliarineqartunik, ICC taama ilisimatitsivoq.
Aqutsisoqarfimmik naggueqatigiinnit Inunnit Pikialasorsuup qanitaani illugiillutik najugaqartunit siulersorneqarlunilu aqunneqartumik pilersitsisoqassaaq.
Inoqarfinni najugaqartuusut isumasioqatigalugit imartallu immikkut illersorneqarnissaata qanoq angitiginissaa aalajangersarneqassasoq tassungalu ilaalluni ammalataq Pikialasorsuaq, isumalluutillu tamaaniittut tamakkerlugit sumiissusersorneqarluassasut.
Kiisalu Pikialasorsuup qanitaaniittut naggueqatigiit killilersorneqanngitsumik imminnut tikeraarlutik angalasinnaaleqqinnissaat periarfissinneqassasoq.
Naalakkersuisuni siulittaasuusimasoq Kuupik V. Kleist isumalioqatigiissitap sulinera peqataaffigaa inassuteqaatigineqartullu pillugit ima oqarpoq:
- Kalaallit Nunaata Canadallu akornanniippoq erlinnartuutit ilaat. Pikialasorsuup qanigisaani inoqarfiit tikeraarlugit tusarniaaffigineqarneranni erseqqissumik oqaatigineqarpoq tamatuma kinguaariinnut kingornutassiissutigineqarnissaa qulakkeerniarlugu oqartussat iliuuseqartariaqartut, Kuupik V. Kleist taama oqarpoq.
Inassuteqaatigineqartullu piviusunngortinniarlugit Nunatsinni Canadamilu naalakkersuisuisunit tapersersorneqassapput, tamannalu Eva Aariap Kuupik V. Kleist peqatigalugu isumalioqatigiissitami suleqataasup naatsorsuutigaa:
- Alloriarnissaq tulliuttoq tassaasariaqarpoq inassuteqaatigineqartut piviusunngortinniarlugit sulilernissaq naggueqatigiillu Inuit imminnut tunngatillugu aalajangiisinnaassuseqarnertik nunaminnik imartaminnilu aqutsilernissaasa tapersersorneqarnissaa, Eva Aarik taama oqarpoq.
