ICC Kenyami ataatsimeersuarnermi peqataavoq
Ataatsimeersuarnermut inuit peqataasut naalagaaffinneersut, aamma suliniaqatigiiffinnit naalakkersuinermut attuumassuteqanngitsunit 700-t sinneqartunit peqataaffigineqartup, kviksølvimik mingutsitsinermut annertusiartuinnartumut, inunnik avatangiisinillu illersuisussamik, pituttuisumik isumaqatigiissusiornissaq anguniarsarissavaat.
Issittumi kviksølvimik annertunerusumik mingutsitsisoqannginnera, ICC-imi avatangiisit pillugit siunnersortip, Parnuuna Egedep, oqaatigaa. Taamaakkaluartoq issittumi innuttaasut aarleqqutissaqarput. Tamanna pingaartumik naggueqatigiinnut Inunnut atuuppoq, tassami naggueqatigiit Inuit nerisaat uumasunik imaani miluumasunik, timmissanik aalisakkanillu nerisariiaaqatigiinnermi qaffasissumik inissisimasunik, taamaattumillu kviksølvimik akoqangaatsiartunik, ilaqarmata.
- Kviksølvi kujasinnerusuminngaanneertarpoq, kisianni anorimit sarfarmillu angallanneqarluni Issittumut annguttarluni, nerisariiaaqatigiinnerlu aqqutigalugu Inuit peqqissusaannut toqqaannartumik akornutaalersarluni, Parnuuna Egede oqarpoq.
Kenyami ataatsimeersuarneq, ullumi naammassisoq, malitseqartitsilluni ataatsimiinnerit pingajussaraat. Ataatsimeersuarnerit sisamassaat aappaagu juunimi pissaaq, kviksølvilu pillugu nunat tamalaat akornanni isumaqatigiissut, ukioq 2013 isumaqatigiinniarnerit tallimassaat pereerpat, isumaqatigiissutigineqarnissaa naatsorsuutigineqarpoq.