ICC: 2015 nuannersumik naaneqarpoq

Naalagaaffiit Peqatigiinni aamma Issittumi Siunnersuisoqatigiinni kiisalu nunanik allanik suleqateqarnerput kattuffimmi eqqissilluta pilersaarusiorsinnaalerparput, ICC-p Kalaallit Nunaanni siulittaasua Hjalmar Dahl ukiortaami oqaaseqaateqarnermini taama allappoq.

Allattoq Jaaku Lyberth

januaarip 06-at 2016 10:55

- Aningaasanut Inatsimmi sipaarniutigisat aarlerisatsinnit annikinnerungaatsiarmata ukioq 2015 nuannersumik naaneqartutut misigisimavarput, ICC Kalaallit Nunaat ukiortaami oqaaseqaateqarluni taama ilaatigut allaaserisaqarpoq.

Kattuffik ICC-p kattuffippassuit akornanni maannamut pitsaasumik angusanut pingaaruteqarluinnartunut Naalagaaffiit Peqatigiinni sunniuteqartarsimanera siulittaasup oqaaseqaammini ersersinniarpaa.

Aamma atuaruk Tapiissutit ikilinissaat ICC-p iluarisimaarpaa

ICC-mi nunanut sisamanut siulittaasuusup Okalik Eegeesiap Parisimi COP21-qarnerani oqaasia issuarneqarpoq ilaatigut oqarami - Nunarsuarmi silap kiatsikkiartorneranut akiuunnitsinni nunat namminersortut eqqaasittuartariaqarpavut matumani pinngortitaq kisimi isigineqarsinnaanngimmat, uagummi Issittumi inuusugut aamma akuulluinnaratta, Okalik Eegeesia oqarpoq.

- Issittuujuarnissatsinnut pisinnaatitaavugut, Okalik ICC-p siulittaasua ilaatigut taama oqarpoq.

ICC kattuffittut ukiunik 40-inngortorsiussaaq taamaattumillu ICC Kalaallit Nunaat nunatsinni ilinniarfiusunut paasititsiniaalluni angalatitsisarnerit Kalaallit Nunaanni ICC-mit aallartinneqarlutik.

- Kinguaariit tulliisa sulinitsinnut akuutinnissaat pisariaqalerpoq, ICC Kalaallit Nunaanni siulittaasoq Hjalmar Dahl ukiortaami oqaaseqaateqarluni taama ilaatigut allappoq.