Qinersisinnaatitaaneq: IA tikisitat qinersisinnaatitaanerannik killileerusunngitsoq
- Inuit Ataqatigiinni isumaqarpugut, uani qitiulluinnaqqissaartoq, tamat oqartussaaqataaneranni piginnaatitaaffik, aammalu ikinnerussuteqartutut inissisimaffik illersorneqartariaqarneq, Bendt B. Kristiansen oqarpoq.
Siumup danskisut innuttaassusillit allat nunatsinni ukiuni marluk arfineq-marlullu akornanni najugaqaqqaarlutik qinersinnaatitaalernissaat pillugu oqallinnissamik siunnersuutaanut Inuit Ataqatigiit isumaqataanngillat.
Kristiansen: Ikinnerussuteqartut illersorneqartariaqartut
Qinersinermi inatsit naapertorlugu danskisut innuttaassusillit nunatsinniilersimasut nunatsinni ukiup affaani aalajangersimasumik najugaqareerlutik qinersisinnaalertarput.
- Uuma massakkut ukiup affaanik nuunnerup kingorna piffissaqarfia qinersisinnaanermik periarfissaritinneqartoq allanngortissallugu pissutissaqartutut isiginngilarput, Bendt B. Kristiansen oqarpoq.
Inuiaqatigiinni ikinnerussuteqartut pisinnaatitaaffii, soorlu assersuutigalugu nunanit naalagaaffeqatigiinneersunit nuuttut qinersinnaatitaanerat illersorneqartariaqartut, Bendt B. Kristiansen isumaqarpoq.
- Tassa tamat oqartussaaqataanerata tunngavia. Minnerpaamik ikinnerussuteqartut aamma nunap aaqqissuussaaneranut sunniuteqarsinnaasariaqartut. Tassanilu sivisussuserineqartoq, nuunnerup kingorna ukiup affaa, taanna naapertuulluinnartutut isigivarput, Bendt B. Kristiansen oqarpoq.
Nunatsinneersut naalagaaffeqatigiinni ikinnerussuteqartuullutik soqutigisaasa illersorneqarnissaat ilungersuutigineqartartoq assersuutigaa, assinganillu nunatsinni ikinnerussuteqartut pisinnaatitaaffii illersorneqartariaqartut Inuit Ataqatigiit isumaqarput.
Immanuelsen kukkusumik tunngavilersuisoq
Taamaasillutillu Siumup Inatsisartuni gruppiata siulittaasuanut, Jens Immanuelsenimut, isumaqataanngillat.
Kalaallit Danmarkimut nuukkunik Folketingimut qinersisinnaatitaanngitsut Siumup Inatsisartuni gruppiata siulittaasua sisamanngormat ilaatigut nassuiaavoq.
Tamannali eqqunngilaq. Danskisut innuttaassusillit naalagaaffeqatigiit iluani innuttaassuseqarunik 18-inillu ukioqalereersimagunik Folketingimut qinersisinnaapput.
Siumup siunnersuutaa Inatsisartunit novembarip ulluisa qulingiluaanni oqallisigineqassaaq. Aamma Siumup qinersiviit amerlanerulersinneqarnissaat pillugu oqallinnissamut siunnersuutaa tassani oqallisigineqassaaq.