Enoksenip saarullittassiiniarnera IA-mit taperserneqartoq
IA-p inatsisartuni aalisarnermut ataatsimiititaliaani ilaasortaatitaa Hans Aronsen tusagassiorfinnut taama allappoq.
2016-imut saarulittaassiissutigineqartut oqallisigineqartarput ukiup ingerlanerani arlaleriarlugit amerlineqartarmata.
2016-mi saarulittassiissutigineqartut katillugit 34.400 tonsinngorput, tassalu uumassusilerisut innersuussutigisaannit pingasoriaammik amerlanerullutik.
Pinngortitaleriffiup 2017-imut saarulittassiissutigineqartussatut 12.400 tonsit innersuussutigaat.
AAMMA ATUARUK Aalisartut misilittagaat biologit innersuussutaannit pingaarnerupput
Aalisarnermut naalakkersuisoq Hans Enoksen KNR-imut marlunngornermi oqarpoq, Pinngortitaleriffiup innersuussutigisaanit pingasoriaammik amerlanerusunik saarullittassiinissaq ilimagineqarsinnaasoq, taamallu oqartoqarnera Hans Aronsenip IA-meersup isumaqatigaa.
- 2016-mi pisassiissutaasut ilassutaasimasullu ataatsimut katinnerat annertussusiliullugu 34.000 tonsit aamma 35.000 tonsit naapertorlugit pisassiisoqarnissaa Naalakkersuisunut innersuussutigiumavara, Hans Aronsen tusagassiorfinnut taama allappoq.
2016-imi pisarineqartut sinnerlugit pisassiisoqariasaassappat tunisassiorfiit tunitsiviillu pisassiissutigineqartussanut tamakkiisumik ingerlaavartumillu tigooraanissaat qularnaarneqarsimanersoq Hans Aronsenip paaserusuppaa.
