IA sipaarniarnermi ernumassuteqarput
Aningaasaqarnermut Naalakkersuisoq Andreas Uldum ilinniartitaanermut peqqissutsimullu tunngasuni suliassaqarfiit annikinnerusunik sipaarfigineqarnissaat tusagassiuutinut nalunaarummini allakkaluartoq, peqqissutsimut tunngasuni suliassaqarfiit, ilaatigut nakorsanit kiffartuunneqarneq 5,2 millionit koruuninik aamma Peqqissartut Illuat 2,5 millionit koruuninik sipaarfiginiarneqarput.
Peqqissutsimut tunngasuni sipaarniartoqarnera Inuit Ataqatigiinnit ernumassutigineqarpoq.
- Sipaarniartoqarnera ajorinngikkaluarlutigu siunnersuutigineqartut ilai paasiuminaatsippagut, Inuit Ataqatigiinni politikkikkut oqaaseqartartoq Naaja Nathanielsen oqarpoq.
Ilinniartitaanermi sipaarniaaneq
Naalakkersuisoqarfiit tamarmik sumi sipaarsinnaanerlutik tikkuaammata sipaarfigineqarniartut amerlapput, aningaasallu sipaarutigineqarniartut assigiinngikkuutaartorujussuullutik.
Aamma atuaruk Naalakkersuisut sumi sipaarniarnerlutik aaliangerpaat
Ilinniartitaanermi aamma sipaartoqarniarpoq, tamannalu Naaja Nathanielsenip iluarinngilaa.
- Ilinniartitaaneq, siunissamilu iluaqutissavut allat sipaarfigissagutsigit sianigeqqissaartariaqarpugut, Naaja Nathanielsen oqarpoq.
Inuiaqatigiinnut malunaataanavianngillat
Andreas Uldumip sipaarniarnerit inuiaqatigiinnut annerusumik malunnaateqarnavianngitsut, soraarsitaanernillu kinguneqarnavianngitsut oqaatigaa.
Aamma atuaruk Aningaasanut inatsimmi 50 millionit sipaarniarpaat
Sipaarniarnerli malunnaataassasut Inuit Ataqatigiinnit isumaqarput.
- Peqatigiiffiit amerlanerit aningaasanik tapersiissutinik qinnuteqartalissapput, taamaammat tapiissutisinissaq sapernarnerulissaaq. Sipaarniartoqalerpat malugisinnaassavarput, Naaja Nathanielsen oqarpoq.
Sipaarniarnerit siunnersuutaagallaannaapput.
Aningaasanullu inatsisissaq akuerineqarpat sipaarniaanerit aallartissapput.
