IA: Qalerallit pillugit akitsuut tamakkiisuunngilaq
Tamanna pillugu Inuit Ataqatigiit sinnerlugit Inatsisartuni ilaasortaq, Naaja Nathanielsen ima oqarpoq.
- Inatsisissatut siunnersuutit ullualunnguit ingerlaneranni suliarineqartut aamma tusarniaassutigineqartut pitsaasumik inerneqarneq ajorput. Taamaattumik tamanna ataatsimiititaliami aalisakkanillu suliaqartunit piffissaqarfigineqarluarluni suliareqqaarneqartariaqaraluarpoq.
Naaja Nathanielsen oqarpoq. Taassuma avataasiorlutik aalisartunut akitsuutugineqartut misissorneqarnissaat siunnersuutigaa.
Aamma atuaruk Akitsuusersuiniarneq erseqqarinnerusoq ujartorneqarpoq
Akitsuut qaffanneqalaarsinnaagaluarpoq
Qalerallit avataasiortunit pisarineqarsimasut maanna akitsuuserneqartarput kiilumut 2 koruunit 50 ørimik, tassalu tamanna inatsisissatut allannguummi allanngortinneqanngitsoq.
- Tamassuma allanngortinneqarluni qaffalaarneqarnissaa qimerloorneqartariaqaraluarpoq.
Naaja Nathanielseni taamaa oqareerluni aamma oqarpoq, ilisimallugu akitsuutissatut siunnersuut aningaasanut inatsisissami, qanittukkut naammassineqartussami ilaatinneqartussaasoq.
- Tassalu tamannarpiaq pissutigalugu siunnersuutisaap akuerineqarnissaa innersuussutigaarput kisiannili tamanna pillugu ilassuteqartussaagatta, tamassuma aningaasaqarnermut ataatsimiititaliami oqallisigeqqinneqarnissaa siunnersuutigalutigu, Naaja Nathanielsen oqarpoq.
Aamma atuaruk Qaleralinnut akitsuusiiniarneq isornartinneqaqisoq tunuartinneqarpoq
Siunnersuut tukappallaaqaaq
Qalerallit akitsuutaasa oqallisigineqarnerat pingajussaaneerlugu, novembarip 17-anni oqallisigineqartussaavoq, tassalu tamanna tukattumik inerneqassanngippat, pingajussaaneerneqannginnerani aningaasanut ataatsimiititaliami oqallisigineqarnissaa, Naaja Nathanielsenip siunnersuutigalugu.
Qaleralinnut akitsuutit Inatsisartut ukiakkut ataatsimiinneranni marlussoriarlugit allanngortinneqartareerput - kingullermik allanngortinneqarlutik siullermik oqallisigineqarnissaani ullormik ataatsimik sioqqullugu.
- Siunnersuut siullerpaaq eqqarsaatigalugu tamanna eqqarsaatigilluagaanngilaq qanorlu kinguneqassanersoq ersernerlulluni, tamassumalu nassuerutigineqarnera qangali pisimasussaagaluarpoq.
Inuit Ataqatigiit sinnerlugit Inatsisartunut ilaasortaq, Naaja Nathanielsen taama oqarpoq.
Aamma atuaruk Qalerallit suliarineqanngittut akitsuusernissaat akerlerineqaqaaq
Qaleralinnut akitsuutissaq pillugu inatsisinik allannguutissaq aqagu marlunngornermi aappassaaneerlugu Inatsisartuni oqallisigineqassaaq novembarillu 17-anni tassa pingaujussaaneerlugu naammassineqassalluni.
