IA-p siulittaasua: Isumaqatigiissut pitsaasunik imaqarpoq
Naalakkersuisooqatigiinnissamut isumaqatigiissut Siumut, Atassut Demokraatillu, ippassaq atsioqatigiissutigaat, Inuit Ataqatigiit Partii Nalerarlu illuatungiliuttunngorput.
Aamma atuaruk IA urani pillugu Kielsenimut naapeqatigiissutissaqarsimagaluarpoq
Illuatungiliuttunngoqqittut Inuit Ataqatigiit isumaqatigiinniaqataasimagaluarput. Siulittaasuatalu isumaqatigiissutip atsiorneqartup imarisai pillugit qanoq isumaqarnersoq paasiniaaffigigatsigu Naalakkersuisooqatigiinnut ilaasimasinnaagaluarluni naliliivoq:
- Soorunami tamaaviat sukumiisumik suli atuanngilara, kisianni atuareersimasakka tunngavigalugu oqarsinnaavunga sorpassuartigut takusinnaavara Inuit Ataqatigiit uunnga aamma peqataasimasinnaagaluartoq. Maluginiarpara Inuit Ataqatigiinnit aamma qineqqusaarutigisimasagut arlallit toqqaannartumik uunnga isumaqatigiissummut ilanngunneqarsimasut, Inuit Ataqatigiit siulittaasuat, Sara Olsvig, KNR-imut oqarpoq.
Aamma atuaruk Naalakkersuisooqatigiilersut tusagassiortunik katersortitsinerat takoqqiguk
Maluginiarsimavaalu Inuit Ataqatigiinnit qineqqusaarutaasimasut arlallit isumaqatigiissummut ilanngunneqarsimasut.
- Nuannaarutigaara, Sara Olsvig oqarpoq, naatsorsuuteqarlunilu oqaatigaa:
- Inatsisartuni suliarineqalerpata qanimut peqataatinneqarumaartugut aammalu isummagut ilaatillugit aalajangiisoqartarumaartoq, politikki patajaatsoq angussagatsigu, tamanna soorunami pisariaqarluinnassagami, Sara Olsvig KNR-imut oqarpoq.