IA-p peqqissutsimut nutaamik Naalakersuisoqalernissaa piumasaraa

Martha Lund Olsenip naalakkersuisuuffimmi saniatigut naalakkersuisoqarfimmik taama annertutigisumik naalakkersuisuugallarnissaa Inuit Ataqatigiit sinnerlugit Inatsisartuni ilaasortanit Juliane Henningsenimit Aaja Chemnitz Larsenimillu apeqquserneqarpoq.

- Ilumut naalakkersuisoqarfiup taama angitigisup naalakkersuisuni allanit ingerlanneqarnissaa pissusissamisoornersoq, Inuit Ataqatigiit matumuuna apeqquseqqikkusupparput, Juliane Henningsen Aaja Chemnitz Larsenilu tusagassiuutinut nalunaarummi ilaatigut taama allaaserisaqarput, nangillutillu:

- Peqqissutsimut naalakkersuisoqarfik Ilaqutariinnermut, Naligiissitaanermut, isumaginninnermut Naalakkersuisumut akisussaaffigitinneqalerpoq. Taamatut aaqqiinikkut naalakkersuisunut ilaasortap ataatsip akisussaaffigissavai 2 milliardit koruunit sinnerlugit. Aningaasanut inatsiserput 6,5 milliardit koruuninik kaaviiaartitaqarpoq, pissusissamisuunngilarlu taama annertutigisumik naalakkersuisunut ilaasortamut ataatsimut akisussaaffiliineq, Inuit Ataqatigiit sinnerlugit Inatsisartuni ilaasortat taakku marluk allapput.

Aamma atuaruk Siumup naalakkersuinikkut ingerlatsinera Olsvigip isornartorsioraa

Maanna Peqqissutsimut naalakkersuisuugallartoq Martha Lund Olsen Inatsisartut Peqqissutsimut ataatsimiititaliaannit oqaloqatiginiarneqartarsimagaluartoq, Juliane Henningsenip Aaja Chemnitz Larsenillu oqaatigaat, peqqinnissamut tunngasunik arlaleriarluni oqaloqatigineqarnissaa kissaatigineqarluni. Martha Lund Olsenili piffissaqartarsimannginnerarpaat, namminneq oqarnerattuut isumaginninnermut tunngasunut suliat siulliunneqartalertarnerannut takussutissaqartoq:

- Tamanna sulianik pingaartitsineq tapersersorparput, oqartariaqarpugullu tunulliussisariaqartarneq takussutissaasoq ersarissoq. Suliassaqarfinnik marlunnik annertoorsuarmik ataatsikkut suliaqarniarneq ajornakusoormat, Juliane Henningsen Aaja Chemnitz Larsenilu ilaatigut allapput.

Aamma atuaruk Doris Jakobsen Folketingimut uteqqippoq