COP21 IA-p Demokraatillu isumaqatigiissut iluarisimaarpaat
Nunanut allanut naalakkersuisoq, Vittus Qujaukitsoq, silap pissusia pillugu isumaqatiginnittoqareersorlu nunap inoqqaavisa pisinnaatitaaffii ilaatinneqannginnerat pakatsissutigalugu arfininngormat nalunaarpoq, immikkullu ineriartornissamut pisinnaatitaaffik immikkut eqqaavaa.
Tamannalu Inuit Ataqatigiinnit Demokraatiniillu isumaqatigineqarpoq.
- Erseqqissumik nunap inoqqaavisa pisinnaatitaaffiisa tamakkiisumik taaneqarsimanissaat pisariaqaraluarpoq, pissutigalugu, nunap inoqqaavi tassaanerusarmata silap pissusiata allanngoriartorneranit eqqugaasut, Inuit Ataqatigiit siulittaasuat Sara Olsvig oqarpoq, ilanngullugulu oqarluni, nunap inoqqaavi silap pissusiata allanngoriartorneranut pissutaanngitsut.
Demokraatit avatangiisit pillugit oqaaseqartartuata, Michael Rosingip, silap pissusia pillugu isumaqatiginninniarnerit qanimut malinnaaffigai.
Nunallu inoqqaavisa pisinnaatitaaffiisa pimoorunneqarpiannginnerat taassuma aamma pakatsissutigaa, kisiannili isumaqatigiissusiortoqarsinnaammat ataatsimut isigalugu nuannaarutissaasoq isumaqarluni.
- Silap kianneruleriartorneranut nunarsuarmi nunat amerlanerpaaat iliuuseqaqataaniarpasilermata nuannaarutigingaarparput, Michael Rosing oqarpoq.
Partiilli pakatsissuteqaraluarlutik isumaqatigiissut tamakkiisumik isigalugu angusaalluaqisoq isumaqarput.
- Eqqaamassavarput, nunat pineqartut, nunat tamalaat akornanni naalagaaffissuit tassaapput mingutsitsinerpaat. Taakkulu aamma uani ilaapput. Taamaammat angusaq imaannaanngitsuuvoq, ingammillu uagutsinnut issittumi najugaqartuusunut pitsaasumik kinguneqartitsisussaavoq, malinneqassappat. Taamaammat taannartaa nuannaarutigisariaqarparput, Sara Olsvig oqarpoq.
