IA-p aningaasanut inatsit talerperliuniarpallaarneraraa
- Aningaasanut inatsit una, taassumalu suliarinerani partiit talerperliuniat politikkiat naleqartitaallu tunngavigineqarput. Partii naalakkersuinikkut ullumi siuttuusoq socialdemokratiskiusutut imminut taasarmat aningaasanut inatsit taamatut isikkoqarnera soorunami tupigaarput, Inuit Ataqatigiinni siulittaasoq Sara Olsvig oqarpoq.
AAMMA ATUARUK IA: Kisitsisit ilaat kusassarneqarsimarpasipput
Partiit assigiinngitsut pingasut suliaat
Aningaasanut inatsit partiinit arlalinnit suliarineqartoq, Demokraatini aningaasanut oqqaseqartartuata Tillie Martinussenip eqqaamaqquaa.
- Partiit pingasuulluta assigiinngitsorujussuusugut eqqaamaneqartariaqarpoq. Qineqqusaarnerup nalaani inuiaqatigiit amigartoorutit ikilisinnissaannut piumasarisaat iluatsipparput. Liberaliugaluaraanni socialistiskiugaluaraanniluunniit angusaq taanna isumaga malillugu naammagittaalliutigineqarsinnaanngilaq, Tillie Martinussen oqarpoq, erseqqissarlugulu aningaasanut inatsit 2015-imoortoq ukiuni tulliuttuni aningaasanut inatsisissanut aallarniutaassasoq.
- Isertitat aningaasartuutillu Aningaasanut inatsimmi assigiinnissaat maannakkut anguniartussaavarput. Tamannalu unammillernarsinnaavoq, Tillie Martinussen oqarpoq.
Sipaarniarpallaartoqarsorigaa
Partii illua tungiuttup aappata Partii Naleqqap aningaasanut inatsit aamma akuerinngilaa. Partiip aningaasanut oqaaseqartartua sipaarniarpallaarisoqarniartoq isumaqarpoq.
- Pingaartumik timersornermut, aammalu meeqqanut inuusuttunullu sammisassaqartitsinermut tunngasut assigiinngitsut, minnerunngitsumillu peqqinnissaqarfiup iluani sullissinermut tunngasut sipaaruteqarfigininiarneqartut Partii Naleqqamiit akuerisinnaannginnatsigit allannguutissatut siunnersuutit amerlasuut itigartippagut, Anthon Frederiksen oqarpoq.
AAMMA ATUARUK Aningaasanut inatsit 2015-imoortoq akuerineqarpoq
Inuit Ataqatigiit Naalakkersuisut aaqqissuusseqqinnerni isertitassatut naatsorsuutaat amerlavallaarsorimmassuk, aamma kisitsisit ilai allanngortinneqarsorimmassuk aningaasanut inatsimmut akuersinnginneranut pissuteqartoq, Sara Olsvig oqarpoq.
Partiit illua tungiliuttut akuersinnginnerat Siumumit ajuusaarutigineqarpoq. Taamaakkaluartoq partiip aningaasanut oqaaseqartartuata Jens Immanuelsenip aaqqissuusseqqinnerit aallartissinnaaanngorneri nuannaarutigaa.
- Siunissami allannguiniarnernut aaqqissuussinernut tunngavissat maannakkut aallartisarneqarput. Inuiaqatigiinni aningaasat siunissaq ungasissoq eqqarsaatigalugu amerlasuut pisariaqartilertussaagatsigit. Neriuppunga aamma aningaasanut inatsisit tulliuttuni eqqartornerani tamakku ilanngullugit qaqilerneqarumaartut, Jens Immanuelsen oqarpoq.