IA: Oqartussaaffimmik nuussineq pissusissamisoorpoq
Royal Greenlandimi pissutsit eqqissisimanerulertariaqarnerarlugit Naalakkersuisut siulittaasuata Hans Enoksenip Ingerlatseqatigiiffinnut Allattoqarfimmik, Naalakkersuisumit Jørgen Wæver Johansenimit oqartussaaffigineqartumik, tigusinera pissusissamisoorluinnartoq Naalakkersuisut siulittaasorigallagaat Inuit Ataqatigiinneersoq Josef Motzfeldt naliliivoq.
- Isumaqarpunga, matumani susassaqartut tamarmik kukkuluttuuteqarsimasut. Torrallaavissimasutut oqaatigineqarsinnaanngillat. Taamaattumik pissutsit pitsanngoriartunngippata inuttaalu pineqarsimappat inuttaa taarseraanni matumani pitsaaneruvoq. Josef Motzfeldt nassuiaavoq.
Naalakkersuisut siulittaasuata Hans Enoksenip oqartussaaffimmik tigusinermini neriuutiginerarpaa, taamaaliornikkut Royal Greenlandimi eqqissisimanerulissasut. Iluaqutaassanerluni ?
- Pissutsit iluarsiartussanersut siumungaaq soorunami naatsorsorneqarsinnaanngillat, isumaqarpugulli qanoq iliuuseqartoqartariaqartoq. Iluatsissanngippatalu patsisivia paasiniarneqartariaqalissaaq. Josef Motzfeldt tunngavilersuivoq.
Inuit Ataqatigiinneersoq Johan Lund Olsen matumani aamma isornartorsiorneqangaatsiarsimavoq, tassunga kinguneqartitsisoqassanerluni ?
- Naalakkersuisunit kinguneqartitsinissamik pilersaaruteqanngilagut aamma Inatsisartut ammaanersiorluni oqallinneranni Johan Lund Olsen soraarsitsinissamik paasineqarsinnaasumik oqarsimaneragaanerminik ajuusaaruteqarpoq. Qanoq allatut iliussagatta ? Uagut eqqartuussillutalu killisiuillutalu kina eqqortumik uppernarsaatissanik oqalunnersoq ujagassarinngilarput. Suliassaq taanna allarluinnarmiippoq. Naalakkersuisut siulittaasorigallagaat tunngavilersuivoq.
Namminersorneq pillugu naalakkersuisoq Jørgen Wæver Johansen oqaseqartinniaraluaratsigu iluatsinngilarput.
Namminersornerullutik Oqartussat pisortaanerat Kaj Kleist ilisimatitsivoq, Ingerlatseqatigiiffinnut Allattoqarfiup sulisuisalu pingasut Naalakkersuisut Allattoqarfiannut piaartumik nuunneqarnissaat ulluni tulliuttuni oqaluuserineqassasoq.
