IA Siumullu nalimmassaanermut aaqqiigallarneq isumaqatigiinngissutigaat
Tassami Kommuneqarfik Sermersuup 2013-imut sanilliullugu 54 millionit koruuninik pilliuteqarnerunissartik naatsorsuutigisimagaluarpaa.
- Eqqumaffigineqarnikuuvoq, budgetilerinermiluunniit allaat 54 millionit tikillugit suli annertunerusumik pilliuteqarnissaq sillimaffigineqarnikuuvoq. Massakkullu Siumut Atassutillu tungaaninngaanniit tusarniaassutigineqarmat una, kommunalbestyrelsimi eqqartorneqarmat, qujarunneqarpoq Siumut Atassutillu tungaaninngaanniit, 54 millionininngaanniit ikinnerusunik ikaarsaariarfimmi nalimmassaasoqarnissaa iluatigalugu, Martha Abelsen, Siumut Atassutillu gruppeformandiat, KNR-imut taama oqarpoq.
2013-imi Kommuneqarfik Sermersooq 83 millioner koruuninik nalimassaanermut pilliuteqarpoq. Taakkulu ukioq manna Vittus Qujakitsoq aningaasaqarnermut naalakkersuisuunerani 20 millioninik ilaneqarput. Marlunngormallu Inatsisartunngortut aaliangiuppaat Kommuneqarfik Sermersuup nalimmassaanermut aamma suli 25 millioninik aappaagu pilliuteqaqqissasoq.
Tassalu Kommuneqarfik Sermersooq, 2013-imi 83 millioninik pilliuteqarsimasoq, 2015-imi 131 millionit koruuninik kommuninut allanut pilliuteqartussanngorpoq. Tassa nalimmasaanermut pilliutai ukiuni marlunnit 45 millionit koruuninik ilaneqarput.
Tamannalu Kommuneqarfik Sermersuup Nunatsinni kommunini piitsuunerpaanngorneranik kinguneqartoq kommunalbestyrelsimi ilaasortap, Inuit Ataqatigiinneersup, Mille Søvndalip oqaatigaa.
- Matoqqasumik tunngavilersorluagaanngitsumillu pilliutaasartut saniatigut Kommunitsinni innuttaasut 45 millionit koruuninik akiliinerusariaqalerneri sooruna ajuusaarutigaarput, Mille Søvndal KNR-imut allappoq.
Taasuuma aamma oqaatigaa Kommuneqarfik Sermersuup pilliuteqarnerunissaa naatsorsuutigisimagitsik, taamaammallu kommunit 2015-mut aningaasartuutissai pilersaarusiorneqarmata atorfiit arlallik atorunnaarsissimallutikkit.
- Taamaammat sulinerput nangiinnassavarput, sipaarniarfissanillu nutaanik ujaasinata. Taamaakkaluartoq pisoq assut ajuusaarnarpoq paasiuminaallunilu. Maanna Kommuneqarfik Sermersooq kommunini piitsuunerpaanngorpoq. Naalakkersuisut politikkiminnik Nunatsinni sanngiinnerpaatut inissisimasut eqqorpaat, Mille Søvndal oqarpoq.
