IA: Naalakkersuisuugallartut uiverput

Naalakkersuisuugallartut naalakkersuinermut tunngasunik qinigaanngitsunik ataatsimeeqateqartarput, taavalu naammattumik paasissutissiinatik suliat ataasiakkaat partiinut isummerfigeqqusarlugit, IA-p siulittaasua isornartorsiuivoq.
Sara Olsvig Assi © : KNR
oktobarip 22-at 2014 10:18
Nutserisoq Jens Thorin

- Sakkortuumik oqaatigissagaanni Siumup demokratiip tunngavigisaa, tassalu innuttaasut sinnerlugit qinikkatut sullissineq atorunnaarsikkaa. Nunarput naalakkersuisuugallartunit sapaatit akunnerini pingasuni aqunneqareersorlu, IA-p taama ersaritsigisumik isornartorsiuivoq.

Sara Olsvig aamma Naaja Nathanielsen naapertorlugit ajornartorsiutaavoq, Naalakkersuisuugallartut siulittaasuat, Kim Kielsen, ingerlatsineq kisiat isumaginagu politikkimik suli ingerlatserusummat.

 

Pisut tamarmik uivernertut Sara Olsvigip isikkoqartippai.

- Ilaatigut partiit gangianni matukkut kasuttoqattaarnikkut siullermik apeqqutit annertuut politikkimik imallit akitinniarsareqattaaraluarpaat. Taamaalisoqarmalli uagut ataatsimiititsinissamik noqqaavugut. Taavali ataatsimiinneq taanna pimmat maluginiarparput, inatsisartuni ilaasortaanngitsunik aamma peqataatitsisoqartoq, Sara Olsvig taama oqarpoq. 

Tassalu Siumumi piffissami pineqartumi siulittaasuugallartoq Jørgen Wæver Johansen, Partii Inuinniit Nikku Olsen aamma atassummiit Knud Kristiansen Inatsisartunut ilaasortaannginnamik inatsisartoqarneq atorlugit naalakkerseriaaseq eqqarsaatigalugu, susassaqanngikkaluarlutik, ataatsimiinnerni peqataasarsimasut, Sara Olsvig oqarpoq.

 

Sara Olsvig aamma isumaqarpoq, partiit siuttui sulianik paasitinneqaqqaaratik politikikkut oqallinnissamut aggersagaasarnerat ajornartorsiutinik pilersitsisoq.

- Taamatut ataatsimiititsissagunik, aammalu politikkikkut imalinnik aalajangiititsissagunik, taava periuseq sunarpiaq malillugu taamaasiorniarpat, malittarisassallu sorpiaat tunngavigalugit ataatsimiititsisarniarpat? Uagut naalakkersuisunut erseqqissumik nalunaarpugut, malittarisassat malillugit naalakkersuinikkullu ingerlatsilluarneq malillugu iliuuseqartariaqartut, Sara Olsvig taama oqarpoq.

 

IA-p siulittaasuata aarleqqutigaa, eqqunngitsumik paasissutissinneqarsimaneq tunngavigalugu puisaanngitsumik aalajangeeqataasimasinnaalluni.

Tamatumani saattuartassiissutinik qaffaaneq pivaa.

Taamaaliornissaq pinngortitaleriffimmiit inassutinut naapertuunnerarlugu saqqummiunneqarpoq, Sulisitsisulli Peqatigiiffiannit GA-mit maanna  tikkuarneqarpoq, naak qaffaaneq inassummut naapertuukkaluartoq, pisassiissutit sinerissap qanittuaniittut avataaniittullu akuleriissinneqarsimasut, naak taakkua uumaffii assigiinngitsuugaluartut.

- Taamaammat  akissutit erseqqissut malittarisassallu erseqqissut uagut piumasaqaatigaagut. Aamma oqaatigaarput, ataatsimiinnernut taamaattunut peqataaqqissasugut, malittarisassat periusissallu erseqqissut naalakkersuisuniit saqqummiunneqarpata, Sara Olsvig oqarpoq.