Politikki

IA: - Naalakkersuisut tatiginneqqilerneq pilersinngilaat

Politikerinut tatiginninnerup pilerseqqinnissaa anguniarlugu Naalakkersuisut oqaatiginikuusaat iluatsinngilaq, IA isumaqarpoq

Allattoq Ivik Kristiansen, Peter Bye Andersen

apriilip 16-at 2015 17:50

Inuit Ataqatigiit Inatsisartut gruppiani siulittaasoq Agathe Fountain Naalakkersuisut ullut 100-ut siulliit atuutereersut taama isornartorsiuivoq.

- Tusagassiutini qulequtat assigiinngitsut amigaataasimanngeqaat, Agathe Fountain oqarpoq.

Naak Kim Kielsenip Aleqa Hammondip tunuarnerata kingorna tatiginninneq uterteqqinniarlugu oqaatigigaluaraa, Naalakkersuisut atuutilernerminniilli assuarnartuliullattaartut, Agathe Fountainip oqaatigaa.

Assuarnartut

Pituffimmi kiffartuussinissamut isumaqatigiissutip Nunatsinnit annaaneqarneranut suliami Naalakkersuisut pissusilersuutaat, Nick Nielsenip Folketingimi Doris Jakobsenimit taarserneqarnera, Naalakkersuisoqarfinnilu pisortat marluk soraarsinneqarnerat IA-p isornartorsiutaannut arlaqartunut ilaapput.

Taamaammat Inuit Ataqatigiit tatiginninnissaminnut suli nangaapput.

- Isumaga malilluguNaalakkersueriaatsimut tukattumut nalornisumullu Inuiaqatigiinni isiginnaarpugut, Agathe Fountain oqarpoq.

Aamma atuaruk Kim Kielsen isorinnittumik apeqqarissaarfigineqartoq

Matoqqaneq

Siumut illuatungiliuttutut inissisimagallarmat Inuit Ataqatigiit Naalakkersuinikkut ingerlatsinerat matoqqavallaarnerarlugu isornartorsiortarnikuuaat.

Taamaakkaluartoq Siumut Naalakkersuisutut inissimmatali Inuit Ataqatigiit suliani arlalinni ilisimatinneqartanngitsut, Agathe Fountainip oqaatigaa.

Taassumallu Naalakkersuisoqarfinni pisortat soraarsitaanerannut suna pissutaanersoq suli paasisimanngimmassuk assersuutitut atorpaa.

Naalakkersuisullu partiit illua tungiliuttunut ammanerunissaannut kaammartorpai.

- Sulinermi periuusissat malillugit sulisoqaruni, ilisimatitsinerit annertuut malinnaatitsinerit annertuut Inatsisartuni ingerlakkaanni ersissutissaqanngilaq, Agathe Fountain oqarpoq.

Naalakkersuisut Siulittaasuata tullersortaa tulleq Knud Kristiansenip ulapinnerani pissarsiarivarput.

Taassuma Agathe Fountainip isornartorsiuinera ajortussarsiornertut tigullugu, inuiaqatigiillu Naalakkersuisunut suli tatiginninnerat qularnarinagu oqaatigaa.

Naalakkersuisut siulittaasuat Kim Kielsen isornartorsiutinut akitinniaraluarparput, atsaalli aqagu tallimanngornermi piffissaqarluni nalunaarpoq.